Son yeniləmə: 7 İyun 2024 08:32
Prof.Dr. Hasan Kılıç: Azərbaycanla KKTC arasında bütün sahələrdə, o cümlədən təhsil sahəsində əlaqələrin hər keçən gün daha da inkişaf etməsi sevindiricidir
BAYRAQDAR MEDİA – “Bu mənim Azərbaycana ikinci səfərimdir. Qardaş Azərbaycana ilk dəfə 10 il öncə səfər etmişdim”.
Bunu BAYRAQDAR MEDİA-ya özəl açıqlamasında Kuzey Kıbrıs Türk Cümhuriyyətində (KKTC) fəaliyyət göstərən Doğu Akdeniz Universitetinin rektoru Prof.Dr Hasan Kılıç dedi.
Xatırladaq ki, mayın 30-da Bakıda keçirilən KKTC universitetlər tanıtım fuarında Prof.Dr Hasan Kılıç başda olmaqla Doğu Akdeniz Universitetinin təmsilçiləri də qatılmışdı.
Tədbir çərçivəsində BAYRAQDAR MEDİA-ya özəl açıqlama verən Prof. Dr Hasan Kılıç bildirdi ki, ötən 10 il ərzində Bakı inanılmaz dərəcədə dəyişib: “Biz sanki hansısa Avropa şəhərinin qonağıyıq. Qardaş Azərbaycanın bu inkişafı bizi inanılmaz dərəcədə sevindirir. Ümumiyyətlə, Azərbaycanın əldə etdiyi nailiyyət, xüsusilə də 44 günlük Vətən müharibəsindəki tarixi zəfər Kıbrıs türklərini qürurlandırıb”.
Müsahibimiz əlavə etdi ki, Azərbaycanla KKTC arasında bütün sahələrdə, o cümlədən təhsil sahəsində əlaqələrin hər keçən gün daha da inkişaf etməsi sevindiricidir: “Təbii ki, Doğu Akdeniz Universiteti olaraq daha çox azərbaycanlı gəncin KKTC universitetlərində, o cümlədən bizim universitetdə təhsil almasını arzu edirik. Bizim universitetdə təhsil alan azərbaycanlı gənclərin bir çox hazırda Azərbaycanda müxtəlif vəzifələrdədir. Bu da bizim onlara keyfiyyətli təhsil verməyimizin nəticəsidir. Biz həmçinin Azərbaycan univeristetləri ilə müəllim və tələbə mübadiləsində maraqlıyıq. Yəni istəyimiz budur ki, həm Azərbaycandan KKTC-yə, həm də KKTC-dən Azərbaycana müəllimlər, o cümlədən tələbələr getsinlər. Bununla qardaşlıq bağlarımız daha da güclənər”.
Prof.Dr Hasan Kılıç onu da qeyd etdi ki, rəhbərlik etdiyi universitetlə Azərbaycanın Memarlıq və İnşaat Universiteti arasında 2011-ci ildən gözəl əməkdaşlıq qurulub: “Bu əməkdaşlıq ikili diplom və digər bu kimi vacib sahələri əhatə edir. Bu dəfə isə Bakıda görüşüb əməkdaşlığın daha da dərinləşdirilməsi istiqamətində razılıq əldə etdik”.
