BAYRAQDAR MEDİA – Azərbaycan Milli Elmlər Akademiyasının (AMEA) Mərkəzi Elmi kitabxanasında (MEK) Azərbaycanda könüllü “Vikipediya” qruplarının formalaşdırılması məqsədi ilə keçirilən növbəti təlimlər uğurla başa çatıb.
Bu haqda xəbər BAYRAQDAR MEDİA-ya MEK-dən daxil olub.
Xəbərdə qeyd olunur ki, “AMEA Rəyasət Heyəti aparatının “Elektron Akademiya” şöbəsinin təşkilatçılığı ilə MEK-də keçirilən təlimlərə bu dəfə AMEA-nın Arxeologiya və Antropologiya İnstitutunun bir qrup əməkdaşı qatılıb və bir ay müddətində virtual ensiklopediyanın incəliklərinə yiyələniblər, məqalələr yaratmaq və redaktə etmək qaydaları haqqında geniş məlumat alıblar. Təlimdə aktiv iştirak edərək 10 məqalə yaratmaq limitini keçən iştirakçılara MEK-in sertifikatları və AMEA Rəyasət Heyəti aparatının “Elektron Akademiya” şöbəsinin Təşəkkürnaməsi təqdim edilib”.
Sonra xəbərdə, “iştirakçıları təltif edən MEK-in direktoru texnika elmləri üzrə fəlsəfə doktoru, Dos. Hüseyn Hüseynov onları təbrik edərək gələcək fəaliyyətlərində uğurlar arzulayıb. Direktor bildirib ki, istər 44 günlük müharibədə, istərsə də ondan sonrakı dövrdə Azərbaycanlı vikipediyaçılar informasiya savaşında da öz töhfələrini verdilər. Azərbaycandilli Vikipediyada MEK-in Elektron resurslar şöbəsinin əməkdaşlarının peşəkarlığını diqqətə çatdıran kitabxana rəhbəri sözügedən şöbənin müdiri Reyhan Əhmədovanın və təlimçi Rəcəb Həsənbəylinin bu sahədə işini yüksək qiymətləndirib. Daha sonra AMEA-nın Rəyasət Heyəti aparatının “Elektron Akademiya” şöbəsinin baş mütəxəssisi, Vikipediya üzrə mütəxəssis Elnur Eltürk Vikipediyada Azərbaycan dili bölməsinin zənginləşməsində MEK-in könüllülərinin xüsusi əməyi olduğunu qeyd edib”.
Sonda Arxeologiya və Antropologiya İnstitutunun Gənc Alim və Mütəxəssislər Şurasının sədri Nigar Mustafayeva təlimçilər adından yaradılan şəraitə görə təşəkkürünü bildirib, təlim müddəti ixtisas sahələri üzrə elektron ensiklopediyada çox sayda məqalələr yaratdıqlarını deyib.
