BAYRAQDAR MEDİA – Azərbaycan Dövlət Kukla Teatrı və “Oyuq” Müstəqil Teatrı Füzuli şəhərinə səfər edib.
Bu haqda xəbər BAYRAQDAR MEDİA-ya Kukla Teatrının mətbuat xidmətindən daxil olub.
Xəbərdə bildirilir ki, “yaradıcı kollektivlər mayın 27-də Füzuli şəhər Mirzə Uluqbəy adına 1 nömrəli tam orta məktəbinin səhnəsində tamaşa və konsert proqramı ilə çıxış ediblər. 28 May – Müstəqillik Günü münasibəti ilə təşkil olunan səfər əsl bayram ovqatı yarada bilib. Ağdam, Füzuli və Xocavənd rayonlarında Azərbaycan Prezidentinin xüsusi nümayəndəliyi, eləcə də Ağdam, Füzuli və Xocavənd rayonlarında Bərpa, Tikinti və İdarəeetmə Xidmətinin dəstəyi ilə keçirilən səfər dolğun və yaddaqalan olub. Kuklaçılar Füzuli sakinləri qarşısında “Məlikməmməd” tamaşası, “Oyuq” Müstəqil Teatrı yetirmələri isə “Can Qarabağ” adlı rəngarəng konsert proqramı ilə çıxış ediblər”.
Daha sonra xəbərdə qeyd edilir ki, “tamaşaçılar əvvəlcə Azərbaycan xalq nağılı əsasında yeni səhnələşdirmədə ərsəyə gələn “Məlikməmməd” tamaşasını izləyiblər. Birhissəli uşaq tamaşasının quruluşçu rejissoru teatrın baş rejissoru Anar Məmmədov, quruluşçu rəssamı isə teatrın baş rəssamı İqbal Əliyevdir. Rejissor bu klassik nümunəni İkinci Qarabağ müharibəsi, Azərbaycanın tarixi Zəfəri ilə əlaqələndirib və ona əlavələr edərək fərqli prizmadan baxmağa çalışıb. Səhnə əsərinin əsas məqsədi uşaq və yeniyetmələrə cəsarət, dürüstlük və mübarizlik aşılamaqdır. Nağılda padşahın üç oğlundan biri olan Məlikməmməd divlər ilə mübarizədə igidlik göstərərək həm onların əsir götürdükləri insanları, həm də bu sayədə məmləkətini xilas edir. O, cəsur, qəhrəman, xeyirxah bir obrazdır. Qardaşlarının xəyanəti nəticəsində zülmət dünyasına düşən qəhrəman Simurq quşunun köməyi ilə işıqlı dünyaya çıxır və tamaşa müsbət sonluqla bitir”.
Anşlaqla keçən nümayişin ardınca “Oyuq”çuların ifalarında hərbi-vətənpərvərlik, eləcə də Qarabağ, zəfər mövzularında klassik və yeni mahnılar səslənib.
