Orhan Çinar: Bu gün biz türk dövlətləri arasında inteqrasiyanın dərinləşməsindən, ata-babalarımızın idealı olan Turandan bəhs edərkən, təəssüflər olsun ki, bəzi xarici ölkələr bundan narahat olurlar
BAYRAQDAR MEDİA – “Hazırda şahlanış dövrünü yaşayan türk dünyasında qardaş Azərbaycanın aparıcı rol oynayan iki ölkədən biri olduğu kimsəyə sir deyil. Bu səfərimdə də əsas məqsəd qardaş ölkədəki inkişafı görmək, azərbaycanlı bacı-qardaşlarımızla təmasda olmaqdır”.
Bunu qardaş Türkiyədən olan siyasi danışman Orhan Çinar dedi.
Bir neçə gün öncə Azərbaycana səfər edən Orhan Çinar BAYRAQDAR MEDİA-ya özəl müsahibəsində türk dünyası ilə bağlı maraqlı məqamlara toxundu. Həmin məqamlara keçməzdən öncə qeyd edək ki, bu müsahibənin alınmasında, həmçinin Orhan Çinarla görüşün təşkilində göstərdiyi dəstəyə görə “Adalia Agency” şirkətinin rəhbəri Dilşad Əhədovaya minnətdarlıq borcumuz var.
“Türk dünyasını əhatə edən qardaş ölkələrə səfər etmək planım var”
Müsahibimiz onu qeyd etdi ki, ümumilikdə türk dövlətlərinə səfər proqramı hazırlayıb: “Ümumiyyətlə türk dünyasını əhatə edən qardaş ölkələrə səfər etmək planım var. Bu planın reallaşmasına isə qardaş Azərbaycandan başlamağa qərar verdim. Məqsədim bu səfər zamanı türk dünyasında hazırda cərəyan edən proseslərin qardaş ölkələrdə öz əksini necə tapdığını görməkdir”.
Türk dünyasının daha da güclü olması üçün hansı addımların atılmasının vacibliyinə gəlincə, müsahibimiz aşağıdakıları dedi: “Bizim bizdən başqa dostumuz yoxdur. Əbəs yerə demirik ki, türkün türkdən başqa dostu yoxdur. Əslində, Azərbaycan Prezidenti cənab İlham Əliyevin fevralın 14-də andiçmə mərasimindəki çıxışı zamanı “Bizim başqa ailəmiz yoxdur. Bizim ailəmiz türk dünyasıdır” deyə bəyan etməsi də məhz yuxarıda bəhs etdiyim məqama söykənir”.
Biz heç zaman işğalçı olmamışıq
Qeyd edilib ki, türk dünyasının daha da güclənməsi üçün türk dövlətləri arasında birlik, inteqrasiya daha da dərinləşməlidir: “Dünya türkün gücünü görməlidir. Dahi Mustafa Kemal Atatürk deyirdi ki, bir türk bütün dünyaya bədəldir. İndi biz də türkün gücünü, qüdrətini, nəyə qadir olduğunu dünyaya nümayiş etdirməliyik”.
Orhan Çinar əlavə etdi ki, “dünya türkün gücünü görməlidir” deyəndə heç də hansısa güc tətbiqindən, yaxud savaşdan söz edilmir: “Biz birliyimizi, bir ola bildiyimizi, yumruq kimi birləşərək problemlərimizi birlikdə həll edə bildiyimizi bütün dünyaya göstərməliyik. Türk birliyindən isə qorxmaq lazım deyil. Bu gün biz türk birliyindən, vahid türk dünyasından, türk dövlətləri arasında inteqrasiyanın dərinləşməsindən, ata-babalarımızın idealı olan Turandan bəhs edərkən, təəssüflər olsun ki, bəzi güclər, bəzi xarici ölkələr bundan narahat olurlar. Halbuki biz heç zaman işğalçı olmamışıq, heç zaman başqa xalqların hüquqlarını tapdalamamışıq. Yəni türk birliyinin təhlükə olduğu iddiasını səsləndirənlərə sözümüz budur – Nə üçün Avropa ölkələri birləşəndə, Avropa Birliyi yarananda, bu, başqa ölkələrə və xalqlara təhlükə kimi qəbul edilmir, amma türk birliyi deyən kimi məsələni başqa yerə yozursunuz? Axı dünyada bir türk ədaləti nümunəsi var”.
Vurğulanıb ki, türklər uzun əsrlər boyu qurduqları imperiyalarada başqa dinlərin və mədəniyyətlərin daşıyıcıları olanlara ən ali səviyyədə dəyər verib, onların hüquqlarını ən üst səviyyədə qoruyublar: “Əskinə, Batıya baxanda biz bunun tamamilə əskini görürük. Heç uzağa getməyık, dövrümüzdə Fransa timsalı ölkələr hələ də müstəmləkəçilik əhval-ruhiyyəsindən qurtiula bilmirlər. Yeni Kaledoniya xalqı azadlıq istəyir və buna cavab olaraq Fransa ora hərbi güc yeridir”.
Türk dünyasının bir olmasını zəruri edən həm də hazırda qlobal məkanda baş verənlərdir
Müsahibimiz bildirib ki, türk dünyasının bir olmasını zəruri edən həm də hazırda qlobal məkanda baş verənlərdir: “Əgər biz bir olmasaq, təhlükələrə qarşı brigə mübarizə aparmasaq o zaman yaşadığımız coğrafiyanı biriləri zəbt etmək, işğal etmək, bu coğrafyada özlərinə uyğun sistem formalaşdırmaq üçün hərəkətə keçəcəklər”.
Bütün sahələrdə güclü olmaq üçün birgə addımlar atmalı, fəaliyyətlərimizi koordinasiya etməliyik
O.Çinar qeyd etdi ki, bu gün türk birlyininin daha da güclü olması deyəndə, heç də təkcə siyasi birlikdən bəhs edilməməlidir: “Biz bütün sahələrdə güclü olmaq üçün birgə addımlar atmalı, fəaliyyətlərimizi koordinasiya etməliyik. Eyni zamanda irəliyə addım atarkən çatışmazlıqlarımızı da deməli, problemləri aradan qaldırmalıyıq. Ən əsası gələcəkdə hər hansı türk dövlətində baş verə biləcək təbii fəalkət, yaxud xarici təhdid və ya daxildə törədilə biləcək hansısa təxribatın önlənməsi üçün Türk Dövlətləri Təşkilatının vahid təhlükəsizlik birlikəri, fövqəladə hadisələrə hazırlıq üçün müdafiə qüvvələri olmalıdır. Yəqin yenə də Batıda bəziləri bunu “türk dünyası ordu yaradır” kimi qələmə verəcək. Amma biz sadəcə özünümüdafiə qüvvələri yaratmalıyıq. Deyək ki, Türkiyənin AFAD qurumu nümunə olmaqla bu qurumunu bir qədər də genişləndirilmiş formasını Türk Dövlətləri Təşkilatı nəzdində yaratmalyıq”.
Türk birliyinin daha da güclü olması üçün medianın üzərinə xüsusi missiya düşür
Orhan Çinar sonda onu da dedi ki, bu gün türk birliyinin daha da güclü olması üçün medianın üzərinə xüsusi missiya düşür: “Media ilk olaraq bizi bizə tanıtmalıdır. Yəni hər şeydən öncə biz özümüzü bilməliyik, kimliyimizi bilməliyik, kökümüzü bilməliyik və özümüzə inamız olmalıdır. Təbii ki, bunun üçün media güclü təbliğat aparmalıdır”.
