BAYRAQDAR MEDİA – Müstəqil M.Teatr – “Mənim Teatrım” Azərbaycanı qardaş Türkiyənin Konya şəhərində keçirilən “Min nəfəs, bir səs” Beynəlxalq Teatr Festivalında təmsil edib.
Bu haqda xəbər BAYRAQDAR MEDİA-ya Teatrın mətbuat xidmətindən daxil olub.
Xəbərdə qeyd edilir ki, “mayın 21-də Teatrın yaradıcı heyəti Stefan Sveyqin “Yad qadının məktubu” tamaşası ilə Konya Tantavi Kültür və Sənət Mərkəzinin səhnəsində Türkiyə tamaşaçıları və xarici ölkələrdən qatılan sənətçilər qarşısında çıxış edib. Tamaşadan sonra yaradıcı heyət Türkiyə Dövlət Teatrlarının baş direktoru Tamer Karadağlı tərəfindən “Teatrın festivaldakı iştirakına görə” fəxri mükafatı ilə təltif olunub”.
Qeyd edək ki, məşhur Avstriya yazıçısı S.Sveyqin “Yad qadının məktubu” novellası əsasında hazırlanmış eyniadlı tamaşanın quruluşçu rejissoru Xalq Artisti Vidadi Həsənov, bəstəkarı Röya Hüseynova, rəssamı Ülkər Əliyevadır.
Rəğbətlə qarşılanan tamaşada rolları V.Həsənov (Hakim), Oksana Rəsulova (Qadın) və Ziya Ağa (Yazıçı) ifa ediblər.
