Bəstəkar İlham Azmanlının 60 illiyi qeyd olunub
BAYRAQDAR MEDİA – Mayın 16-da Rəşid Behbudov adına Dövlət Mahnı Teatrında bəstəkar İlham Azmanlının “Ömrün 60 səhifəsi” adlı yaradıcılıq gecəsi keçirilib. “Müəllif Hüquqları Uğrunda” İctimayi Birliyinin təşkilatçılığı ilə keçirilən gecədə bəstəkarın sənətinə dəyər verən və onun yaradıcılığını dəstəkləyən incəsənət xadimləri, tələbə yoldaşları və musiqisevərlər iştirka ediblər.
Bu barədə BAYRAQDAR MEDİA-ya “YAZ Media Group”dan məlumat verilib.
Bildirilib ki, tədbirin aparıcısı Ayla Qafqazlı tamaşaçıların nəzərinə çatdırıb ki, bəstəkar İlham Azmanlının əsərləri 1983-cü ildən etibarən müxtəlif vaxtlarda Bakı, Gəncə, Moskva, Sankt-Peterburq, Kiyev, Vilnyus, Almatı, Roma, Amsterdam, Hamburq, Paris, İstanbul və Ankara kimi şəhərlərdə ifa olunub: “ O, Fransa Bəstəkarlar Assosiasiasının vəkalətilə Ümumdunya Müəllif Hüquqları Assosiasiasının üzvüdür və bəstəkarın müəlliflik hüquqları bütün dünyada və kosmik məkanda qorunur”.
Məlumata əsasən, gecənin rəsmi hissəsində Azərbaycan Yazıçılar Birliyinin və Bəstəkarlar İttifaqının üzvü, Gənclər mükafatçısı, Prezident təqaüdçüsü Aysel Kərim, Bəstəkarlar İttifaqının üzvü, Xalq artisti, “Müəllif Hüquqları Uğrunda” İctimai Birliyinin üzvü Sərdar Fərəcov çıxış edərək yubilyarı təbrik ediblər.
Sonra bədii hissə başlayıb. Gecənin bədii hissəsində öncə İlham Azmanlının çoxşaxəli yaradıcılığının bir hissəsi, instrumental əsərlər səslənib. Sonra bəstəkarın mahnı janrlarında yazdığı bəstələr Xalq artisti Eyyub Yaqubov və Eyyubxan Təbrizlinin ifasında tamaşaçılara təqdim olunub.
Çoxsalı, elm, mədəniyyət və incəsənət xadimlərinin də iştirak etdiyi gecənin sonunda söz yubilyara verilib. İlham Azmanlı onun yaradıcılığına böyuk dəyər verən gecəsinin təşkilatçıları Müəllif Hüquqları Uğrunda İctimayi Birliyinin bütün heyətinə və xüsusilə birliyin sədri Əməkdar artist, Azərbaycan Bəstəkarlar İttifaqının üzvü, Avrasiya Hüquq sahibləri Təşkilatları Konfederasiyasının (AHTK) Baş Direktoru Gövhər Həsən-zadəyə, “YAZ Media Group”a, eləcə də əziz gündə onu tək qoymayan bütün həmkar və dostlarına dərin minnətdarlığını bildirib.
