Son yeniləmə: 17 May 2024
Hasan Öztürk: Daha dərindən araşdırma ilə 2007-ci ildəki FETÖ qədər qədər güclü olmayan, bununla belə dövlətin içinə sızmış bir quruplaşmanı ifşa etmək mümkün olacaq
BAYRAQDAR MEDİA – “Son hadisələr diqqəti yenidən FETÖ-yə yönəldib. Daha doğrusu, məlum olub ki, cinayətkar təşkilatın lideri Ayhan Bora Kaplanla bağlı aparılan istintaq çərçivəsində polisin “bir nəfərin adını dəyişdirərək gizli şahid tutması” ilə vəziyyət tamam başqa müstəviyə keçib.
Bunu qardaş Türkiyədə fəaliyyət göstərən “Ülke” TV-nin rəhbəri, tanınmış jurnalist Hasan Öztürk son hadisələri BAYRAQDAR MEDİA-ya dəyərləndirərkən deyib.
Xatırladaq ki, Türkiyənin paytaxtı Ankarada “Ayhan Bora Kaplan” istintaqı çərçivəsində daha 4 nəfər saxlanılıb. Cinayət təşkilatı ilə bağlı iddialarda adı keçən 3 polis rəisi və Ankara Polis İdarəsinin 1 komissarı həbs olunub. Onu da qeyd edək ki, MHP-nin genel başqanı Devlet Bahçelinin dövlət çevrilişinə cəhd ehtimalı ilə bağlı bəyanatından sonra Cümhurbaşqanı Recep Tayyip Erdoğan Türkiyə xüsusi xidmət orqanlarının rəhbərliyi ilə təcili görüş keçirib. Bütün bu hadisələr isə diqqəti yenidən zaman-zaman Türkiyə dövlətini ələ keçirmək istəyən FETÖ və “Nurçu-Okuyucu”lara yönəldib”.
Məsələnin kifayət qədər təhlükəli məqamlardan xəbər verdiyini deyən H.Öztürk bildirib ki, bu çərçivədə verilən bəyanatlarda həm sayın Cümhurbaşqanı, həm daxili işlər naziri, həm də sayın Devlet Bahçeli “FETÖ-nün vali quruplaşması” ifadəsini işlətdilər: “Bu da təsüdüfi deyil. Çünki cinayət prosesi zamanı FETÖ-nün taktikasından istifadə edilib. 2007-ci ildən etibarən FETÖ-nün əl atdığı çirkin taktika demək olar ki, təkrarlanıb. Məlum olub ki, öncə Cümhurbaşqanına yaxın siyasətçi və iş adamlarının hədəfə alındığı, oradan da R.T.Erdoğan və MHP lideri D.Bahçeliyə yönəlmək üçün bir siyasi tələ hazırlanıb”. H.Öztürk cinayət prosesi ilə bağlı olduqca vacib bir məqama da toxunub: “Burada belə bir ifadə var ki, “gizli şahidi razı salarkən “yuxarıya başqana da məlumat verildi” deyilib”. Deməli, bu cinayətin, belə deyək, dövlət çevrilişinə cəhdin arxasında Ankara polisində daha yüksək vəzifələrdə dayanan kimlərinsə olduğuna dair məlumatlar da var. Yəni eynilə bir zamanlar FETÖ-nün etdiyi kimi, bu dəfə də ipin ucu yuxarılara doğru uzanır. Buna görə də araşdırma daha diqqətlə və daha dərindən aparılmalıdır. Yəni, məsələ dörd nəfərlə məhdudlaşsa, yanılmış olarıq. Ancaq daha dərindən araşdırma ilə 2007-ci ildəki FETÖ qədər qədər güclü olmayan, bununla belə dövlətin içinə sızmış bir quruplaşmanı ifşa etmək mümkün olacaq”.
Müsahibimiz deyib ki, artıq məsələyə dair müxtəlif fikirlər səslənir: “Gün ərzində FETÖ-nün polis imamlarından olan Kemalettin Özdemirin də adı hallanıb. Onun qurduğu “KÖZ” adlı quruplaşmanın adı da çəkilib. Bunun dəqiqliyi araşdıma nəticəsində ortaya çıxacaq. Amma reallıq budur ki, jurnalistlərin, bürokratların, siyasətçilərin dinlənilməsi ilə daha bir cinayət törədilib. Fikrimizcə, Türkiyə dövlətinə qarşı FETÖ kimi xaricdən idarə edilən, daxildən cəlb edilmiş bürokratlar və siyasətçilər vasitəsilə həyata keçirilən əməliyyatın şahidi oluruq. Bu gün daxildə daha güclü bir quruplaşma var. Bu struktur bir mənada “Nurçu-Okuyucu”lara oxşar addımlar atıb. Amma onun adı hələ tam dəqiqləşməyib. Tutulan ilmə çözülə bilinirsə, strukturun adı da forması da gün üzünə çıxar”.
