BAYRAQDAR MEDİA – Bakı Dövlət Universitetinin (BDU) Jurnalistika fakültəsində “Azərbaycan Mətbuat Şurası” auditoriyasının açılışı olub. Toplantıda Mətbuat Şurası İdarə Heyətinin üzvləri, BDU-nun rəhbərliyi, o cümlədən fakültənin pedaqoji kollektivinin üzvləri və tələbələr iştirak ediblər.
Xəbəri BAYRAQDAR MEDİA-ya sözügedən Şuradan veriblər.
Bildirilir ki, “BDU-nun rektoru Elçin Babayev çıxışında Jurnalistika fakültəsində peşəkar kadrların hazırlanması zamanı tələbələrin praktik bilik və bacarıqlara yiyələnmələrinin əhəmiyyətindən söz açıb. O, bu baxımdan “Azərbaycan Mətbuat Şurası” auditoriyasının əhəmiyyətli olacağına əminliyini vurğulayıb”.
MŞ sədri Rəşad Məcid də auditoriyanın tələbə-jurnalistlərin təcrübi biliklərə yiyələnmələrinə dəstək perspektivindən danışıb: “O bildirib ki, Şuranın Şikayətlər üzrə Komissiyasının iclaslarının bu auditoriyada tələbələrin iştirakı ilə keçirilməsi nəzərdə tutulub”.
R.Məcid iclasların jurnalist fəaliyyəti ilə bağlı nöqsanları aşkara çıxarmaq baxımından əhəmiyyətli tərəflərinə diqqət çəkib və deyib ki, tələbələr iş prosesindəki spesifik cəhətlərə nəzər salmaqla, peşəkar fəaliyyətləri zamanı səhvlərdən sığortalana biləcəklər: “Düşünürəm ki, bu, onların yetişməsində mühüm rol oynayacaq”.
MŞ sədrinin müavini, sözügedən fakültənin dekanı Vüqar Zifəroğlu “auditoriyanın yaradılması təşəbbüsünün konkret məqsədlərindən söz açıb. O, mövcud təşəbbüsün ilk növbədə Şura ilə Jurnalistika fakültəsinin əlaqələrini daha da genişləndirəcəyinə inandığını deyib. İkinci məqsəd MŞ İdarə Heyətinin üzvləri ilə tələbələr arasında müntəzəm görüşlərin təşkilidir. Üçüncü məqam MŞ-nin bəzi komissiyalarının iclaslarının fakültədə təşkilidir ki, bu, gənclər üçün maraqlı və əhəmiyyətlidir”.
Toplantıda fakültədən Prof. Cahangir Məmmədli, MŞ sədrinin müavini, ATV telekanalı prezidentinin müşaviri Səadət Məmmədova, MŞ İdarə Heyətinin üzvləri – Jurnalistika fakültəsinin kafedra müdiri, Prof. Qulu Məhərrəmli, “Şərq” qəzetinin baş redaktoru Akif Aşırlı və başqaları çıxış edərək auditoriyanın perspektiv faydaları ilə bağlı düşüncələrini bölüşüb, təşəbbüslərini səsləndiriblər.
