Son yeniləmə: 16 Aprel 2024 12:32
BAYRAQDAR MEDİA – Türkmənistan Xarici İşlər Nazirliyində Türkmənistan və ABŞ arasında illik siyasi məsləhətləşmələrin növbəti raundu keçirilib.
Məlumatı turkmenportal.com yayıb.
Bildirilib ki, “danışıqlar zamanı Türkmənistan nümayəndə heyətinə Türkmənistanın xarici işlər naziri Rəşid Meredov, Amerika nümayəndə heyətinə isə ABŞ dövlət katibinin Güney və Orta Asiya üzrə müavini Con Pommersheim rəhbərlik edib. Bu barədə Türkmənistan Xarici İşlər Nazirliyinin rəsmi saytında məlumat verilib”.
Məlumatda qeyd edildiyi kimi, tərəflər Türkmənistan-Amerika münasibətlərinin hazırkı vəziyyətini və gələcəyini müzakirə edib, beynəlxalq gündəliyin aktual məsələləri ətrafında fikir mübadiləsi aparıblar: “Tərəflər regional və qlobal təhlükəsizlik məsələlərini də müzakirə ediblər. Siyasi məsələlərlə yanaşı, ticarət-iqtisadi əlaqələr, ekologiya, mədəniyyət, təhsil və humanitar məsələlər ikitərəfli əməkdaşlığın prioritet istiqamətləri kimi qeyd edilib. Bununla bağlı Türkmənistanın Təhsil Nazirliyində aylıq iclasların keçirilməsinin və təhsil sahəsində yol xəritəsinin təsdiq edilməsinin vacibliyi vurğulanıb”.
Məlumata görə, həmçinin ikitərəfli münasibətlərin əsas istiqamətlərindən biri kimi Türkmənistan və ABŞ-ın mədəni və təhsil proqramlarına sadiqliyini təsdiq edən təhsil sahəsində Anlaşma Memorandumunun əhəmiyyəti vurğulanıb: “Bundan əlavə, görüş iştirakçıları C5+1 formatında çoxtərəfli diplomatik arenaya dəstəklərini təsdiqləyiblər”.
