BAYRAQDAR MEDİA – Mədəniyyət Nazirliyi, Elm və Təhsil Nazirliyi (ETN), Azərbaycan Televiziya və Radio Verilişləri Qapalı Səhmdar Cəmiyyəti (AzTV), Xətai Rayon İcra Hakimiyyəti (XRİH), Azərbaycan Rəssamlar İttifaqının (ARİ) dəstəyi, Azərbaycan Dövlət Rəsm Qalereyası (ADRQ)və Xətai Sənət Mərkəzinin (XSM) təşkilatçılığı ilə “Yaşıl dünya naminə həmrəylik ili” çərçivəsində uşaq, yeniyetmə və gənclərin yaradıcılığını stimullaşdırmaq, həmçinin bədii zövqün inkişafına xidmət məqsədi ilə elan olunmuş “Baharın rəngləri“ respublika uşaq rəsm yaradıcılıq turnirində 700-dən çox 10-21 yaş arası uşaq, yeniyetmə və gənc 15 nəfərlik qruplarla XSM-də plenerlərdə iştirak ediblər.
Bu haqda xəbər BAYRAQDAR MEDİA-ya sözügedən Mərkəzdən daxil olub.
Xəbərdə deyilir ki, “turnirdə iştirakçılar akvarel boyalar ilə bahar mövzusunda rəsm əsəri ərsəyə gətiriblər və bu əsərlər arasından ən yaxşıları sərgilənmək üçün seçilib. Turnirin yekun sərgisi aprelin 13-ü saat 15:30-da XSM-də açılacaq. Seçim zamanı müəllifin yaşı nəzərə alınmaqla düzgün kompozisiya, rəng seçimi və fərdi düşüncəyə üstünlük verilib”.
Bildirək ki, sərgilənəcək əsərlər Mərkəzin kolleksiyasında saxlanılacaq.
Onu da qeyd edək ki, əsəri sərgidə nümayiş olunan müəlliflərə sertifikat və hədiyyə təqdim olunacaq.
