BAYRAQDAR MEDİA – Bakı Beynəlxalq Multikulturalizm Mərkəzinin (BBMM) mühüm layihələrindən olan “Sabahın liderləri: gənclər “sivilizasiyaların toqquşması”na qarşı” mövzusunda təşkil olunan XIV Beynəlxalq multikulturalizm qış məktəbinin iştirakçıları Azərbaycan İlahiyyat İnstitutunda (Aİİ) olublar.
Bu haqda xəbər BAYRAQDAR MEDİA-ya Aİİ-dən daxil olub.
Xəbərdə qeyd olunur ki, “Aİİ rektoru, Dos. Aqil Şirinov Qış məktəbinin iştirakçılarına Azərbaycanda mövcud olan dinlərarası harmoniya, həmçinin ali təhsil müəssisəsinin fəaliyyəti barədə ətraflı məlumat verib. Azərbaycanın tarixən müxtəlif mədəniyyətlərin və dinlərin kəsişməsində yerləşdiyini qeyd edən rektor Azərbaycanda mövcud dinlərarası harmoniyadan bəhs edib. Rektor Azərbaycanda tarixən müxtəlif dinlərin və məzhəblərin nümayəndələrinin birlikdə sülh şəraitində yaşadıqlarını vurğulayıb. Azərbaycanın dinlərarası harmoniya, tolerantlıq və multikulturalizm ənənələri, eyni zamanda, məzhəblərarası münasibətlər baxımından dünyaya nümunə olduğunu diqqətə çatdırıb”.
A.Şirinov daha sonra ali təhsil müəssisəsinin yaranması və fəaliyyəti haqqında geniş məlumat verib. Bildirib ki, İnstitutda xüsusi ilə “Dinşünaslıq” ixtisasında İslamla yanaşı, digər dinlər haqqında kifayət qədər geniş məlumatlar verilir. O, bu məlumatların normativ deyil, deskriptiv yolla tədris olunduğunu vurğulayıb. Rektor magistratura səviyyəsində müxtəlif dinlərlə bağlı olan ixtisaslaşmalar haqqında da məlumat verib.
