BAYRAQDAR MEDİA – “Ümumi təhsil müəssisələrində şagird davranış qaydalar”nın bu ilin sonuna qədər Bakı məktəblərinin demək olar ki, hamısında tətbiq olunacağı gözlənilir. Bunu Bakı Şəhəri üzrə Təhsil İdarəsinin (BŞTİ) müdir əvəzi Nərminə Hüseynova deyib.
Bu haqda xəbər BAYRAQDAR MEDİA-ya Elm və Təhsil Nazirliyinin (ETN) mətbuat xidmətindən daxil olub.
Xəbərdə deyilir ki, “N.Hüseynova qeyd edib ki, “Ümumi təhsil müəssisələrində şagird davranış qaydaları” çox əlçatan və müfəssəl sənəddir ki, bu da həm məktəbə, həm də valideynlərə şagirdin necə olmalı olduğunu, təhsil müəssisəsində özünü necə aparmalı olduğunu başa düşməyə imkan verir”.
O, bildirib ki, hazırda layihə BŞTİ-nin tabeliyində olan 62 ümumi təhsil müəssisəsində həyata keçirilir: “Pilot layihənin birinci mərhələsinin nəticələrinin təhlili göstərdi ki, bu məktəblərdə tədris mühiti müsbət istiqamətdə dəyişir. Bununla belə, bir daha vurğulamaq lazımdır ki, məktəb mühitinin formalaşmasında məktəblə valideynlər arasında əməkdaşlıq mühüm rol oynayır. Təhsil müəssisələri valideyn icmaları ilə münasibətlərinə əsaslı şəkildə yenidən baxmalı, bu istiqamətdə işləri gücləndirməlidirlər. Cəmiyyətdən, xüsusən də valideynlərdən lazımi dəstək olmasa, tez nəticə əldə etmək çox çətin olacaq”.
