Britaniya parlamentində Azərbaycanın üzləşdiyi minalar təhlükəsindən bəhs edilib
BAYRAQDAR MEDİA – Britaniya parlamentində Azərbaycanın üzləşdiyi mina təhlükəsi ilə bağlı məlumatlılığın artırılması məqsədi ilə tədbir keçirilib.
Bu barədə BAYRAQDAR MEDİA-ya Azərbaycanın Britaniyadakı səfirliyindən məlumat verilib.
Bildirilib ki, “Britaniya parlamentində fəaliyyət göstərən Partlayıcı Qurğulardan Qaynaqlanan Təhlükələr Qrupu və mina qurbanlarına uzun müddətli dəstək məsələlərini təşviq edən REVIVE adlı qeyri-hökumət təşkilatının Azərbaycan Respublikasının Minatəmizləmə Agentliyinin (ANAMA) və Azərbaycanın Britaniyadakı səfirliyinin dəstəyi ilə təşkil etdiyi tədbir “Azərbaycanda mina fəaliyyəti və mina qurbanlarına yardım” mövzusuna həsr olunub. Tədbirdə Britaniya parlamentinin nümayəndələri, Britaniya Xarici İşlər Nazirliyi və Müdafiə Nazirliyinin nümayəndələri, Britaniyalı akademik və ekspertlər, minalardan təmizləmə məsələləri ilə məşğul olan təşkilatların nümayəndələri və media nümayəndələri iştirak edib. ANAMA-nın İdarə Heyətinin sədr müavini Samir Poladov tədbirdə təqdimatla çıxış edib. Tədbirdə ANAMA-nın əməkdaşı Ramil Əzizov da iştirak edib”.
Məlumata görə, açılış nitqində Azərbaycanın Britaniyadakı səfiri Elin Süleymanov 30 illik işğal və hətta ondan sonrakı dönəmdə Ermənistanın Azərbaycan ərazilərində minlərlə minalar basdırması və bunun ağır humanitar nəticələrindən bəhs edib: “Azad edilmiş ərazilərin minalardan təmizlənməsinin regionda sülhün əldə edilməsi üçün vacib faktorlardan biri olduğunu deyən səfir Süleymanov bu istiqamətdə göstərdiyi maliyyə və ekspert dəstəyinə görə Britaniya hökumətinə təşəkkür edib. Minaların təkcə insan həyatı üçün deyil, ətraf-mühit üçün də zərərli olduğunu bildirən səfir təhlükənin bu aspektinə diqqət çəkmək üçün Azərbaycan tərəfindən atılacaq addımlar, o cümlədən bu il Bakıda keçiriləcək COP29 tədbiri çərçivəsində mövzu üzrə keçirilməsi planlaşdırılan yan tədbir barədə məlumat verib. Səfir ötən ilin iyun ayında ANAMA-nın müxtəlif beynəlxalq tərəfdaşlar, o cümlədən Mine Advisory Group ilə tərəfdaşlıqda Azərbaycanda ilk qadın minatəmizləmə qruplarının yaradılması üçün təlimlərin keçirilməsinə istinad edərək bu məqamı həm də ölkə gündəmi üçün vacib bütün məsələlərdə qadınların roluna verilən əhəmiyyət kimi xüsusi vurğulayıb”.
Məlumatda deyilir ki, daha sonra parlamentdə fəaliyyət göstərən Partlayıcı Qurğulardan Qaynaqlanan Təhlükələr Qrupunun Sədri, İcmalar Palatasının deputatı Matthew Offord çıxış edib. M.Offord Sədrlik etdiyi Qrupun Azərbaycandakı mina təhlükəsi ilə bağlı gördüyü işlərdən qürur duyduğunu söyləyib, əməkdaşlıq üçün Azərbaycan tərəfinə minnətdarlıq edib, görülən işin Azərbaycan üçün faydaları ilə yanaşı, qazanılmış təcrübənin mina təhlükəsi ilə üzləşən digər coğrafiyalarda da tətbiqi baxımından olduqca vacib olduğunu bildirib. O, Qrupun Azərbaycana bu xüsusda dəstəyini siyasi yanaşma kimi deyil, məhz humanitar əsaslı və əhalinin gələcək rifahına yönəlmiş fəaliyyət kimi vurğulayıb.
Mərasimdə ANAMA İdarə Heyəti sədrinin müavini Samir Poladov çıxış edərək qonaqlara “Mina Çirklənməsi və onun Dayanıqlı İnkişafa Təsirləri” mövzusunda təqdimat edib.
Məlumatda qeyd edilir ki, Britaniyada fəaliyyət göstrərən Mine Advisory Group – MAG adlı qeyri-hökumət təşkilatının nümayəndəsi qurumun Azərbaycanda həyata keçirdiyi layihələr və qabiliyyətlərin artırılmasına verdiyi töhfələrdən söz açıb.
Sonda çıxış edən, REVIVE təşkilatının rəhbəri Nigel Ellway Parlament Qrupunun sədri Matthew Offordla birlikdə ötən iki il ərzində bir neçə dəfə Azərbaycana səfər etdiyini və mina təhlükəsinin yaratdığı çətinliklərlə yerində yaxından tanış olduğunu deyib. O, həmçinin Azərbaycanın azad edilmiş ərazilərində işğal zamanı dağıdılmış milli və dünya əhəmiyyətli mədəni abidələrin bərpa edilməsində ərazilərin minalanması səbəbindən yaranmış çətinlikləri diqqətə çatdırıb. Bu məsələni ötən ilin dekabr ayında Londonda yerləşən Viktoria və Albert Muzeyində mina təhlükəsinin mədəni irsə dağıdıcı təsirləri mövzusunda keçirilən tədbirdə də qaldırdığını deyən N.Ellway bu məqamın diqqətdə saxlanılmalı olduğunu vurğulayıb”.
Tədbir sual-cavab sessiyası ilə başa çatıb.
