Vüqar İskəndərov: Çünki qondarma “erməni soyqırımı” məsələsində olduğu kimi, Sumqayıt hadisələrində də həqiqətlərin üzə çıxması ermənilərə sərf etmir
BAYRAQDAR MEDİA – “Yarandığı vaxtdan türk dünyasına qənim kəsilən Ermənistan xarici havadarlarının dəstəyi və təhriki ilə müxtəlif cinayətlər törədib. Bu cinayətlərə dair Ermənistanın öz arxivlərində də kifayət qədər tutarlı faktlar var. Həmçinin, 1988-ci ildə keçmiş SSRİ DTK-sının hazırladığı və seçilmiş ermənilər tərəfindən reallaşdırılan hadisələrə dair də Ermənistan arxivlərində məlumatlar var”.
Bunu BAYRAQDAR MEDİA-ya açıqlamasında Milli Məclisin deputatı Vüqar İskəndərov deyib.
Deputat bildirib ki, məhz buna görə də Ermənistan arxivlərinin açılması reallaşmır: “Çünki dediyim kimi, Ermənistan arxivləri açılarsa, bütün həqiqətlər, o cümlədən Sumqayıt hadisələrinə dair həqiqətlər üzə çıxacaq. Həm Ermənistan, həm də dünya ictimaiyyəti baş verən hadisələr haqqında həqiqətləri öyrənəcəklər”.
Deputat qeyd edib ki, ermənilər uzun illər xalqımıza qarşı qanlı cinayətlər törədiblər: “Özü də onlar bu cinayətlərə “haqq qazandırmaq” üçün müxtəlif oyunlara, çirkin ssenarilərə baş vurublar. Kimsəyə sirr deyil ki, bu zaman da onlara Batıdakı, yaxud quzeydəki dostları, ağaları dəstək veriblər. 36 il öncə Sumqayıtda baş verənlər də həmin silsiləyə daxildir”.
V.İskəndərovun sözlərinə görə, Sumqayıt hadisələrinin keçmiş KQB-nin ssenarisi əsasında Ermənistanın və erməni millətçilərinin maraqlarına və planlarına uyğun hazırlanaraq həyata keçirildiyi kimsəyə sirr deyil: “Eyni zamanda Ermənistan xüsusi xidməti və erməni millətçilərinin bu hadisələrdə fəal iştirakı da təkzibolunmaz faktlardır. Bunun belə olduğunu sadə bir şəkildə isbat etmək üçün hadisələrin törədilməsi və ondan sonra baş verənlərin xronologiyasına nəzər yetirmək kifayətdir. Təsadüfi deyil ki, Sumqayıt hadisələrini qızışdıran və qətlləri törədən məhz ermənilər olub. Onlara rəhbərlrik edən isə iki dəfə məhkum olunmuş Eduard Qriqoryanla adlı erməni olub. Amma nəticədə, proses necə davam etdi? Əsas təşkilatçı E.Qriqoryan olsa da məhz keçmiş SSRİ DTK-sının cızdığı ssenariyə uyğun olaraq Sumqayıt hadisələrinin təşkilatçısı kimi azərbaycanlı Əhməd Əhmədov güllələndi. Halbuki şahid ifadələri əsl günahkarın əslində erməni əsilli Eduard Qriqoryan olduğunu sübut edir. Lakin onu sürətli bir şəkildə Moskvaya apararaq qorudular. Çünki o məhz DTK-nın sifarişini yerinə yetirmişdi”.
Deputat sonda, “indi buyursun özünü demokrat kimi qələmə verən Nikol Paşinyan real addım atsın. Dövlət arxivlərinin açılmasına göstəriş versin və bunu reallaşdırsın. Amma bunu edəcəyi inandırcı görünmür. Çünki Nikol Paşinyan yaxşı bilir ki, Sumqayıt hadisələrinin arxasında da ermənilər var. Ona görə də qondarma “erməni soyqırımı” məsələsində olduğu kimi, Sumqayıt hadisələrində də həqiqətlərin üzə çıxması ermənilərə sərf etmir” deyib.
