BAYRAQDAR MEDİA – Fevralın 20-də Polşanın Azərbaycandakı Səfirliyi və Milli Azərbaycan Tarixi Muzeyinin birgə təşkilatçılığı ilə Azərbaycanın neft və qaz sektorunda böyük xidmətləri olmuş polşalı mühəndis, ixtiraçı, geoloq Vitold Zqlenitskiyə həsr olunmuş “Polşalı Nobel” adlı kitabın (Azərbaycan və ingilis dillərində. Müəllif: Polşa ictimai xadimi, Prof. Andjey Yan Xodubski) təqdimat mərasimi keçirilib.
Bu haqda xəbər BAYRAQDAR MEDİA-ya sözügedən Muzeydən daxil olub.
Xəbərdə bildirilir ki, “Muzeydə keçirilən tədbirdə qurumun direktoru, akademik Nailə Vəlixanlı, Polşanın Azərbaycandakı fövqəladə və səlahiyyətli səfiri Rafal Poborski, Azərbaycan Milli Məclisinin deputatı Vüqar Bayramov, Azərbaycan Milli İncəsənət Muzeyinin direktoru, sənətşünaslıq üzrə fəlsəfə doktoru, Dos. Şirin Məlikova, sosiologiya üzrə ictimai elmlər doktoru Samir Səttərov, AMEA-nın əməkdaşları, Bakıdakı “Polonya” Mədəni Əlaqələrin İnkişaf İctimal Birliyi, səfirliyin, muzeyin əməkdaşları, KİV nümayəndələri iştirak ediblər.Tədbiri giriş sözü ilə açan N.Vəlixanlı qonaqları salamlayıb və tədbirin əhəmiyyətini qeyd edərək, Azərbaycanın neft və qaz sektorunda böyük xidmətləri olmuş V.Zqlenitskinin həyat və fəaliyyətinə həsr olunmuş kitabın ərsəyə gəlməsini yüksək qiymətləndirib. Sonra Polşanın səfiri R.Poborski çıxış edərək, Azərbaycan-Polşa tarixi-mədəni əlaqələrini vurğulayıb”.
Sonra xəbərdə deyilir ki, “daha sonra tədbirdə sözügedən kitabı polşa dilindən Azərbaycan dilinə tərcümə edən S.Səttərov çıxış edərək V.Zqlenitskinin həyatı və nailiyyətləri haqqında mühazirə deyib. S.Səttərov çıxışında qeyd edib ki, V.Zqlenitski Varşava İqtisadiyyat Məktəbinin riyaziyyat-fizika fakültəsinin və Sankt-Peterburqdakı Mədən İnstitutunun məzunu olub. O, həmçinin bildirib ki, V.Zqlenitski Azərbaycan ərazisində və Xəzər dənizinin dibində karbohidrogen ehtiyatlarının bolluğunun müəyyən edilməsi ilə də məşğul olub, onu “Bakı neftinin atası” adlandırıblar”.
Tədbirin sonunda yeni nəşr olunmuş kitablar qonaqlara hədiyyə edildi və xatirə fotosu çəkilib.
