BAYRAQDAR MEDİA – Fevralın 14-də Azərbaycan Milli İncəsənət Muzeyində “Muzeydə musiqi” adlı yeni layihə çərçivəsində görkəmli alman bəstəkarı İ.S.Baxa həsr olunmuş “Siz Baxı sevirsinizmi?” adlı ilk konsert proqramı keçirilib.
Bu haqda xəbər BAYRAQDAR MEDİA-ya sözügedən Muzeydən daxil olub.
Xəbərdə deyilir ki, “tanınmış mədəniyyət xadimləri, xarici dövlətlərin Azərbaycandakı səfirləri və digər diplomatik nümayəndələrin iştirak etdiyi tədbirdə qonaqları salamlayan muzeyin direktoru Şirin Məlikova layihə haqqında məlumat verib. O qeyd edib ki, Mədəniyyət Nazirliyi və İncəsənət Muzeyinin təşkilatçılığı ilə keçirilən layihənin hər bir mərhələsi musiqi və təsviri sənətin müəyyən epoxasına həsr olunacaq. Burada tamaşaçılara həm dünya klassik musiqisindən, həm Azərbaycan bəstəkarlarının yaradıcılığından əsərlər, həm də milli, caz, etnik musiqi təqdim ediləcək. Hər bir konsert proqramı qısa tematik ekskursiyalarla da müşaiyət olunacaq. Sənətşünaslıq üzrə fəlsəfə doktoru Nigar Axundova isə öz çıxışında layihənin daşıdığı önəm və kəsb etdiyi mühüm əhəmiyyətdən geniş söz açıb”.
Daha sonra tamaşaçılar qarşısında Əməkdar artist Fuad İbrahimovun dirijorluğu və Səidə Tağızadənin solistliyi ilə Bakı Kamera Orkestri çıxış edib.
