BAYRAQDAR MEDİA – Azərbaycan memarı, sənətşünaslıq üzrə elmlər doktoru, Prof. Elçin Əliyevin “Bakı memarlığı fotorəsmlərdə və açıqcalarda” adlı kitabı nəşr edilib.
Müəllif kitabla bağlı BAYRAQDAR MEDİA-ya məlumat verib: “Bildirim ki, kitab Bakı Şəhər İcra Hakimiyyətinin sədri Eldar Əzizovun sifarişi ilə 2023-cü ilin dekabrında nəşr edilib. Nəşrdə mən Bakının “Art Nouveau” dövrünün, yəni XIX əsrin sonunun ən gözəl 35 binasının tarixi, sahibləri, memarı və s. haqqında məlumat vermişəm. Onu da qeyd edim ki, müasir Qərblə qədim Şərqin qovşağında öz memarlığına görə unikal olan Bakıda çoxlu sayda gözəl binalar arasından bir neçə memarlıq abidəsini seçmək çox çətin idi”.
Bildirək ki, nəşrdə Bakı şəhər Dumasının binası, Hacı Zeynalabdin Tağıyevin evi, Murtuza Muxtarovun sarayı, Ağa Musa Nağıyevin “İsmailiyyə” binası, 28 may küçəsində yaşayış binası və s. tikililər haqqında məlumatlar, fotorəsmlər yer alır.
Qeyd edək ki, E.Əliyev memarlıq, dizayn və şəhərsalma sahəsində 20 kitabın və 160 elmi məqalənin müəllifidir.
