BAYRAQDAR MEDİA – Fevralın 13-ü saat 17:00-da Milli İncəsənət Muzeyində “Mədəni yaddaşımızda Qərbi Azərbaycan” sərgisi çərçivəsində “İrəvan Sərdar sarayının inciləri” adlı mühazirə keçiriləcək.
Bu haqda xəbər BAYRAQDAR MEDİA-ya sözügedən Muzeydən daxil olub.
Xəbərdə qeyd edilir ki, “mühazirədə görkəmli rəssam Mirzə Qədim İrəvaninin vaxtilə İrəvan Sərdar sarayının interyerini bəzəmiş, hazırda Gürcüstan Dövlət İncəsənət Muzeyində mühafizə edilən məşhur divar pannolarının bərpa prosesi haqqında bəhs olunacaq. Mövzu üzrə məruzə muzeyin Elmi bərpa şöbəsinin müdiri, ali dərəcəli bərpaçı-rəssam, qeyd edilən əsərlərin bərpasına rəhbərlik etmiş Natiq Səfərov tərəfindən təqdim ediləcək. İştirakçılar mühazirədə interaktiv ekran (touchscreen) vasitəsi ilə bərpa prosesini əks etdirən foto və yazılı materiallarla tanış olacaqlar”.
