BAYRAQDAR MEDİA – Qardaş Özbəkistandakı Heydər Əliyev adına Azərbaycan Mədəniyyət Mərkəzi özbək mətbuatı, televiziya və radio kanalları ilə sıx əməkdaşlıq yaradıb və hazırda milli mədəniyyətin, Azərbaycan musiqisinin təbliği ilə bağlı birgə layihələr işlənilir.
Bu haqda xəbər BAYRAQDAR MEDİA-ya sözügedən Mərkəzdən daxil olub.
Xəbərdə deyilir ki, “bununla əlaqədar, media şirkətləri ilə əldə olunan razılıq əsasında Özbəkistanın yerli radio kanallarında müxtəlif verilişlər çərçivəsində Azərbaycan incəsənət ustalarının musiqilərinin yayımlanması həyata keçiriləcək. Mərkəz cari ilin fevral ayının 5-dən Özbəkistanın 102.0 FM tezliyində yayımlanan və ölkədə populyar olan “Avtoradio” kanalında müasir Azərbaycan estrada nümayəndələrinin musiqilərinin yayımlanmasına başlayıb”.
Sonra xəbərdə qeyd edilir ki, “ilkin olaraq müasir Azərbaycan musiqisi – Xalq artistləri Gülyanaq Məmmədova, Röya Ayxan, Brilliant Dadaşova, Aygün Kazımova, Eyyub Yaqubov, Faiq Ağayev, Əməkdar artistlər Mətanət İsgəndərli, Aygün Bəylər, Ədalət Şükürov, İlkin Əhmədov, müğənni Çinarə Məlikzadə, Almaxanım Əhmədlinin ifa etdikləri musiqilər seçilərək Özbəkistanın 102.0 FM “Avtoradio” kanalına təqdim edilib. Musiqi nömrələri özbək tərəfinin kriteriyaları əsasında seçilib və gələcəkdə növbəti mərhələlərdə digər Azərbaycan incəsənət ustalarının musiqiləri də dinləyicilərə təqdim olunması məqsədi ilə radio kanallarına təqdim olunacaq”.
Qeyd edək ki, “Avtoradio” kanalında “Azərbaycan musiqisini kəşf et” adlı radioveriliş çərçivəsində müasir Azərbaycan estradasının nümayəndələrinin musiqiləri Novruz bayramına qədər efirdə səsləndiriləcək.
“Azərbaycan musiqisini kəşf et” adlı I mərhələ başa çatdıqdan sonra gələcəkdə bu ənənə həm “Avtoradio”, həm də Özbəkistanın digər populyar radio kanalları ilə daimi olaraq davam etdiriləcək.
