Xəzər Süleymanlı: “Bir neçə il idi arzulayırdım ki, orkestrin müşayiəti və səslənən şeirlərə hazırlanmış səhnəciklərlə fərqli bir poeziya gecəsi edim. Nəhayət, arzuma çatıram”
BAYRAQDAR MEDİA – Martın 5-də Heydər Əliyev Sarayında “Avanqard” Kamera Orkestrinin müşayiəti və xüsusi qonaqların iştirakı ilə tanınmış bədii qiraət ustası Xəzər Süleymanlının 8 mart Beynəlxalq Qadınlar Gününə həsr etdiyi “Sənin üçün” adlı konserti keçiriləcək.
X.Süleymanlı konsert ilə bağlı fikirlərini BAYRAQDAR MEDİA ilə bölüşdü: “Bu konsertin üzərində çoxdan çalışırdıq. Hətta bir neçə il idi arzulayırdım ki, orkestrin müşayiəti və səslənən şeirlərə hazırlanmış səhnəciklərlə fərqli bir poeziya gecəsi edim. Nəhayət, arzuma çatıram. Ölkədə ilk dəfə bu səviyyədə poeziya gecəsi baş tutacaq. Ümid edirəm ki, tamaşaçılar bu gecəni unutmayacaqlar. Xatırladım ki, keçən il yanvarın 15-i və 16-sı Heydər Əliyev Sarayında, iyunun 25-i isə Yaşıl Teatrda anşlaq konsertim baş tutub. Budəfəki konsert isə əvvəlkilərdən tamam fərqli olacaq”.
Qiraətçi onu da qeyd etdi ki, konsertə 1 ay qalmış bütün biletlər satılıb.
“Bəs sizdən başqa kimlərsə çıxış edib şeir deyəcək və ya sizinlə duet olacaqmı” sualına isə “Çox açıqlama verə bilmirəm, qoy, hamı üçün sürpriz olsun” cavabını verdi.
