Cavid Aydın: Eskişehir Azərbaycanlılar Dərnəyi olaraq biz də soydaşlarımızın seçkidə yüksək səviyyədə iştirakı üçün lazım olan addımları atır və fəallıq göstəririk
BAYRAQDAR MEDİA – “Azərbaycan xalqı 2020-ci ildə 44 günlük Vətən müharibəsində müharibə meydanında tarix yazdı. Elə bir tarix ki, nəinki illər, hətta əsrlər keçsə də hər zaman ondan bəhs ediləcək. Bu bizim qürur və şərəf tariximizdir”.
Bunu BAYRAQDAR MEDİA-ya özəl açıqlamasında Eskişehir Azərbaycanlılar Dərnəyinin sədri Cavid Aydın deyib.
Bu, Qalib Xalqın Zəfər Seçkisi olacaq
O, qeyd edib ki, Azərbaycan xalqı növbəti tarixi də 2024-cü il fevralın 7-də yazacaq:“Bu tarixi isə siyasət meydanında yazacaq. Fevralın 7-də ölkəmizdə növbədənkənar prezident seçkiləri keçiriləcək. Bu, müstəqil Azərbaycanda bütün ölkə ərazisində keçiriləcək ilk seçkilər kimi tarixə düşəcək. Bu, Qalib Xalqın Zəfər Seçkisi olacaq. Hesab edirəm ki, bu baxımdan tarixdə öz yerini alacaq”.
Biz bir daha öz birliyimizi, həmrəylimizi bütün dünyaya nümayiş etdirməliyik
C.Aydın əmin olduğunu bildirib ki, bu seçkilər başqa bir baxımdan da tarixə yazılacaq: “Hesab edirəm ki, biz bir daha öz birliyimizi, həmrəylimizi bütün dünyaya nümayiş etdirməliyik. Yəni necə ki, Vətən müharibəsində 7-dən 77-yə bir yumruq kimi birləşdik, bu birlik sayəsində Müzəffər Ali Baş Komandanın rəhbərliyi və ordumuzun qəhrəmanlığı ilə zəfər əldə etdik, eyni ilə də seçki günü birlik nümayiş etdirməliyik. Əminəm ki, səsvermə hüququ olan bütün vətəndaşlar məhz bu qətiyyətlə addım atacaq və bu seçki seçicilərin mütləq əksəriyyətinin səs verdiyi seçki kimi Azərbaycan tarixinə düşəcək”.
Ölkədən kənardakı Azərbaycan vətəndaşları da fəal olmalıdırlar
Müsahibimiz bildirib ki, bu məsələdə ölkədən kənarda işləyən, təhsil alan və müvəqqəti yaşayan Azərbaycan vətəndaşları da fəal olmalıdırlar: “Təbii ki, Eskişehirdəki Azərbaycan vətəndaşları da bu cür fəal olmalıdırlar və olacaqlarına da şübhə etmirəm. Çünki Eskişehirdəki Azərbaycan seçicilərində də bir ruh yüksəkliyi var. Onlar mütəşəkkil şəkildə seçkidə iştirak etmək istəyirlər. Eskişehir Azərbaycanlılar Dərnəyi olaraq biz də soydaşlarımızın seçkidə yüksək səviyyədə iştirakı üçün lazım olan addımları atır və fəallıq göstəririk”.
Eskişehirdə səyyar səsvemə təşkil ediləcək
Onun sözlərinə görə, Azərbaycanın Türkiyədəki səfirliyinin və Xarici İşlər Nazirliyinin müvafiq göstərişi ilə Eskişehirdə səyyar səsvermə təşkil ediləcək: “Belə ki, Eskişehirlə yanaşı Kütahya və Afyonda olan Azərbaycan vətəndaşları da gəlib Eskişehirdə səs verə biləcəklər. Səfirliyin Türkiyənin xarici və daxili işlər nazirliklərinə yazdığı bilgiləndirmə məktubuna əsasən səyyar səsvermə Eskişehir Azərbaycanlılar Dərnəyində reallaşdırılacaq. Bununla da Eskişehir Azərbaycanlılar Dərnəyinin ofisi 6-7-8 fevral tarixlərində, seçkidən bir gün əvvəl, seçki günü və seçkidən bir gün sonra diplomatik sahə, yəni səfirliyin ərazisi hesab edilib”.
Hazırda da qeydiyyat davam edir
Qeyd edilib ki, Eskişehirdə bununla bağlı çalışmalar davam edir: “Hər kəsə məlumat verilib. İnsanlar qeydiyyatdan keçib. İlk dəfədir ki, Türkiyədə səfrilik və konsulluq ərazisindən kənarda da seçicilərin ayağına seçki qutusu aparılır. Beləliklə də fevralın 7-də gün ərzində seçicilər onlara uyğun saatda gəlib öz səsvermə hüququndan istifadə edə biləcəklər. Hazırda da qeydiyyat davam edir. Qeydiyyata düşə bilməyənlər də seçki günü gəlib şəxsiyyət vəsiqəsini, yaxud xarici pasportunu təqdim edərək səsvermədə iştirak edə biləcəklər”.
