BAYRAQDAR MEDİA – Xalq artisti Vidadi Həsənovun rəhbərliyi, Qanun Nəşriyyatı və “M.Teatr”ın təşkilatçılığı ilə elan edilən Yaradıcı Emalatxanada dramaturgiya və ssenari kursları fəaliyyətə başlayıb.
Kurslara müraciət edənlər əsərlərin ideya strukturunu, yazılma texnikasını, dramaturgiya qaydalarını dərindən mənimsəyəcək və təcrübi biliklərə yiyələnəcəklər.
Yaradıcı Emalatxananın koordinatoru, yazıçı-ssenarist Cəlil Cavanşir kurslarla bağlı BAYRAQDAR MEDİA-ya məlumat verib: ”Bu kurslar incəsənət, ədəbiyyat və kino və təhsil sahəsində görəcəyimiz işlərin sadəcə başlanğıcıdır. Yaxın gələcəkdə bu sahələrlə bağlı fərqli, faydalı və maraqlı layihələrimiz olacaq. Sadaladığım sahələrdə ciddi boşluqlar var və bir vətəndaş kimi bu boşluqları doldurmaq, faydalı işlər görmək arzusundayıq. Ümid edirəm gördüyümüz işlər Azərbaycan gəncləri üçün faydalı olacaq”.
Bildirək ki, dramaturgiya və ssenari yazarlığına marağı olan, teatr və kino sahəsində qələmini sınamaq istəyənlər Yaradıcılıq Emalatxanaya müraciət edə bilər.
Qeyd edək ki, Emalatxanada tanınmış yazıçılar, ssenaristlər, dramaturqlar, rejissorlar, prodüsserlərlə görüşlər olacaq və ustad dərsləri keçiriləcək.
