BAYRAQDAR MEDİA – AMEA Mərkəzi Elmi Kitabxanasındakı nəşrlər sırasında Məhəmməd Əmin Rəsulzadənin “Bir türk milliyyətçisinin Stalinlə ixtilal xatirələri” kitabı da var.
Nəşri hazırlayan türkiyəli tarixçi, Azərbaycan siyasi mühacirət tarixinin araşdırıcısı, Prof. Sebahattin Şimşirdir.
Kitabin girişində deyilir: “M.Ə.Rəsulzadənin Rusiya çarlığına qarşı mübarizəsində Stalinlə ortaq iş təcrübəsi olub. Bu işin nəticəsi sonralar hər iki şəxsiyyəti müxtəlif zəminlərdə və zamanlarda bir araya gətirib. Bunun da nəticəsində Rəsulzadə ruslar Azərbaycanı işğal etdikdən sonra bir müddət gizlənməyə müvəffəq olur, amma daha sonra tutulur. O, Bakıda həbsdə olarkən Stalin tərəfindən Moskvaya aparılır. İki ilə yaxın Moskvada yarı azad, yarı əsir halda yaşayan Rəsulzadə bir gün fürsət tapıb Finlandiyaya qaçmağı bacarır. Sözügedən bu əsər Rəsulzadənin Stalinlə 1905-1922-ci illərdəki xatirələrindən bəhs edir”.
Qeyd edək ki, əsərdə “O zamankı şərtlər daxilində Bakı”, “Stalinlə ilk təmas”, “Stalinin xatirələri”, “İngilis-rus rəqabəti”, “Moskva yolunda”, “Antisemitizm”, “Atatürk haqqında”, “Bir məqalənin macərası”, “Ənvər Paşanın təklifi”, “Türkiyə Qurtuluş Savaşının təlatümlü günlərində” və s. başlıqlarda yazılar verilib.
