Tərbiyəçi-müəllimlərin işə qəbulu

Son yeniləmə: 24 Yanvar 2024 11:02

Bununla bağlı müsabiqəsinin müsahibə mərhələsi keçirilir

BAYRAQDAR MEDİA – Bakı Şəhəri üzrə Təhsil İdarəsinin (BŞTİ) tabeliyindəki məktəbəqədər təhsil müəssisələrinə tərbiyəçi-müəllimlərin işə qəbulu üzrə müsabiqənin müsahibə mərhələsi keçirilir.

Bu barədə BAYRAQDAR MEDİA-ya yanvarın 24-də BŞTİ-nin Mətbuat xidmətindən məlumat verilib.

Bildirilib ki, “test imtahan mərhələsində uğur qazanan (35 və daha çox bal toplayan) və 12 dekabr 2023-cü il tarixinədək müsahibə və vakansiya seçimi müraciətlərində qeydiyyatdan keçən namizədlər bal ardıcıllığına uyğun olaraq müsahibə mərhələsinə dəvət olunurlar. Qeyd edək ki, müsahibə mərhələsində namizədlərin psixoloji və peşəkar keyfiyyətləri müvafiq komissiya tərəfindən yoxlanılır”.

Məlumata görə, müsahibənin nəticəsi namizədin şəxsi kabinetinə göndəriləcək: “Nəticələrlə bağlı müraciətlərə müsabiqə başa çatdıqdan sonra Apelyasiya Komissiyası tərəfindən bir həftə ərzində baxılacaq”.