Güney Azərbaycan Milli Dövlətçilik Şurası prezident seçkisində xalqı fəal iştiraka və Prezident İlham Əliyevin yanında olmağa çağırır
BAYRAQDAR MEDİA – “Son 20 ildə Azərbaycan Respublikası Prezident İlham Əliyevin uzaqgörən, bilgə rəhbərliyi ilə böyük bir inkişaf yolunu qət etmişdir. 30 il erməni tapdağında olan torpaqlarımızın düşmən işğalından qurtarılması, Azərbaycan Respublikası coğrafiyasının bütünündə tam suverenliyimizin bərpası, hərtərəfli təhdidlərə baxmayaraq dövlət müstəqilliyimizin gündən-günə daha da gücləndirilməsi, birbaşa Prezident İlham Əliyevin apardığı qətiyyətli, ardıcıl siyasi kursun nəticəsidir”.
Bu fikirlər Azərbaycan Respublikasında növbədənkənar prezident seçkisi ilə bağlı Güney Azərbaycan Milli Dövlətçilik Şurasının yanvarın 23-də qəbul etdiyi Bəyanatda öz əksini tapıb.
Mərkəzi Şura başqanı Çingiz Göytūrkün BAYRAQDAR MEDİA-ya verdiyi məlumata görə, Bəyanatda daha sonra deyilir: “Ötən 20 il ərzində Prezident İlham Əliyevin apardığı çoxyönlü inkişaf strategiyasının sonucu olaraq Azərbaycan Respublikası müxtəlif sahələr üzrə inanılmaz uğurlara imzasını atan, uluslararası arenada öz sayqın yerini tutan, bölgəmizdə güclü müttəfiqləri ilə birgə ciddi söz sahibi olan bir dövlətə çevrilmişdir. Son illərdə cənab Prezidentin Türk Dövlətləri Təşkilatının fəaliyyətinin güclənməsindəki rolu, eyni zamanda Azərbaycan Respublikası sınırlarından kənarda yaşayan 40 milyon Azərbaycan türkünün hüquqlarının qorunmasında sərgilədiyi tutum bütün türk dünyasının təqdirini toplamış, Azərbaycan Respublikası Dövlətini 50 milyonluq azərbaycanlının Dövləti qılmışdır”.
O da qeyd edilib ki, Azərbaycan Respublikasında növbədənkənar prezident seçkisinin keçirilməsi, dünyada və bölgədə tarazlığın köklü dəyişikliklər süəcinə girdiyi bir zaman kəsiyində gerçəkləşməsi bu seçkinin önəmini qat-qat artırmaqdadır: “Məhz belə bir həssas məqamda əldə edilən möhtəşəm zəfərlərin, inanılmaz uğurların möhkəmləndirilməsi, yeni-yeni zəfərlər və uğurların qazanılması üçün GÜCLÜ DÖVLƏT və GÜCLÜ LİDER olmazsa-olmaz şərtdir. Bu gerçəklikdən yola çıxaraq Güney Azərbaycan Milli Dövlətçilik Şurası prezident seçkisində xalqımızı fəal iştiraka və Prezident İlham Əliyevin yanında olmağa çağırır”.
