Dr. Yücel Karauz: 2023-cü ildən bu günə qədər həyata keçirilən işlər “türk ordu modeli” deyilən modern ordu sisteminə keçid istiqamətində fəaliyyəti sürətləndirmişdir
BAYRAQDAR MEDİA – “Cənab Prezident İlham Əliyev 44 günlük Vətən müharibəsindən sonra Azərbaycanın türk ordu modelinə keçəcəyini bəyan etmişdi. Əslində, bu, yəni türk ordu modeli modern ordu sistemidir”.
Bunu BAYRAQDAR MEDİA-ya özəl açıqlamasında Türkiyənin Azərbaycandakı sabiq hərbi attaşesi, ehtiyatda olan general Dr. Yücel Karauz deyib.
Onun sözlərinə görə, modern ordu sistemi o deməkdir ki, Azərbaycan ən müasir hərbi texnika və texnologiyaya, çevik Silahlı Qüvvələrə və öz ərazisinə dəqiqliklə bəlli olan, ən yüksək səviyyədə təlim görmüş əsgərlərə, gecə-gündüz, istənilən şəraitdə hərəkət edə bilən hərbi birliklərə malik bir sistem formalaşdırır: “Bu istiqamətdə atılması vacib olan əsas addımlardan biri təlim-tədris fəaliyyətləridir ki, Azərbaycan bu sahədə də müsbət mənada fərqlənir. Azərbaycanın müasir tələblərə cavab verən Milli Müdafiə Universitetinin yaradılması deyilənlərin əyani təsdiqidir”.
Xatırladaq ki, yanvarın 22-də müdafiə naziri general-polkovnik Zakir Həsənov Azərbaycanda səfərdə olan Türkiyənin Milli Müdafiə Universitetinin rektoru professor Erhan Afyoncunun rəhbərlik etdiyi nümayəndə heyəti ilə görüşüb. Qonaqları salamlayan general-polkovnik Z.Həsənov iki ölkə arasında ikitərəfli hərbi əməkdaşlığın dostluq və qardaşlıq münasibətləri üzərində qurulduğunu bildirib. Müdafiə naziri qardaş ölkə Türkiyə ilə digər sahələrdə olduğu kimi, hərbi təhsil sahəsində də əməkdaşlığın yüksək səviyyədə olmasından məmnunluğunu ifadə edib. Nazir hərbi təhsil sahəsində qarşılıqlı təcrübə mübadiləsinin hərbi qulluqçuların bilik və bacarıqlarının artırılmasına müsbət təsir etdiyini vurğulayıb.
Dr. Y.Karauz deyib ki, 2023-cü ildən bu günə qədər həyata keçirilən işlər “türk ordu modeli” deyilən modern ordu sisteminə keçid istiqamətində fəaliyyəti sürətləndirmişdir: “Ümumiyyətlə, ordu quruculuğu ən dinamik dəyişim məsələsidir. Dəyişən şərtlərə görə sürətli olaraq ordunun təhsilini, təşkilatı quruluşunu, doktorinasını dəyişdirmək lazım olur. Dolayısı ilə cənab Ali Baş Komandan İlham Əliyevin göstərişi və rəhbərliyi ilə həyata keçirilən tədbirlər, buna uyğun olaraq formalaşdırılan yeni sistem və həmin sistemin şərtlərinə cavab verən hərbi mütəxəssislərin önə çəkilməsi önəm kəsb edir. Bundan başqa keçmişdə korpuslar birbaşa Müdafiə Nazirliyinə bağlı idi. Ancaq artıq korpuslardan ibarət Quru Qoşunları Komandanlığı təşkil edilmişdi. Yəni korpuslar əmri birbaşa Quru Qoşunları Komandanlığından alacaqlar. Bu da türk ordu sisteminə keçidin bir şərti olaraq reallaşdırılıb”.
Dr. Y.Karauz bildirib ki, bütün bunlar cənab İlham Əliyevin 20 illik prezidentliyi dövründə ordu quruculuğuna göstərdiyi diqqət və qayğının bu gün dəyişən şərtlərə görə yeni dövrdə də davam etdiyini təqdiqləyir: “Məhz bu diqqət və qayğı sayəsində Azərbaycan ordusu dünya orduları sırasında önəmli inkişaf əldə edib. Ötən 20 il ərzində əldə edilən uğurların mərkəzində isə 44 günlük Vətən müharibəsində dünyaya da nümunə olacaq qələbənin qazanılması dayanır”.
