Bakı “Tripadvisor” tərəfindən kulinariya şəhərləri sırasına daxil edilib
BAYRAQDAR MEDİA – Bakı məşhur səyahət platforması sayılan “Tripadvisor” tərəfindən aparılan reytinq cədvəli üzrə dünyanın “Ən yaxşı kulinariya destinasiyası” nominasiyasında 20 şəhər arasında 13-cü yerdə qərarlaşıb.
Bu barədə BAYRAQDAR MEDİA-ya yanvarın 18-də Dövlət Turizm Agentliyindən məlumat verilib.
Bildirilib ki, “ümumi olaraq platrforma tərəfindən “Səyahətçilərin seçimi – Ən yaxşıların yaxşısı” nominasiyası üzrə son 12 ay ərzində istifadəçilər tərəfindən tövsiyə olunan hotel, restoran və digər kateqoriyalar üzrə reytinq cədvəlləri tərtib olunub. Reytinq cədvəllərinə “Tripadvisor” platformasında olan 8 milyondan çox səyahət üzrə məkandan yalnız 1%-i düşə bilib”.
Qeyd edilib ki, “Tripadvisor” turistlər üçün maraqlı məkanları, ən yaxşı hotelləri, yemək üçün uyğun yerləri tövsiyə edir: “Hər ay 463 milyon səyahətçiyə xidmət göstərən platformada ziyarətçilər məkanlarla bağlı istifadəçi şərhlərini oxuya və tövsiyələrə uyğun seçimlərini edə bilirlər. Veb-saytda 8,6 milyon yerləşmə vasitəsi, restoran, hava yolları və gəmi səyahəti haqqında 859 milyondan çox istifadəçi rəyi mövcuddur”.
