Tanınmış jurnalistlər Mehmet Akif Ersoy və Adem Metan pərəstişkarları ilə görüşüb
BAYRAQDAR MEDİA – Fəaliyyətində sosial və mədəni layihələrə də böyük önəm verən Denizli Böyükşəhər Bələdiyyəsi, “Mədəniyyət Görüşləri” proqramında Türkiyənin tanınmış şəxslərini qonaq etməkdə davam edir.
Bu barədə BAYRAQDAR MEDİA-ya bələdiyyədən məlumat verilib.
Bildirilib ki, “Proqram çərçivəsində bu dəfə məşhur jurnalistlər Mehmet Akif Ersoy və Adem Metan qonaq olub. Böyükşəhər Bələdiyyəsi Nihat Zeybekci Konqres və Mədəniyyət Mərkəzində təşkil edilən proqrama Denizli Böyükşəhər Bələdiyyə başqanı Osman Zolan, baş katibin müavini Serhat Akbulut, Mədəniyyət və Sosial İşlər Dairəsinin müdiri Hüdaverdi Otaklı, tələbələr və çox sayda qonaq qatılıb. Proqram Pəncə-Kilit əməliyyatı bölgəsində şəhid olan əsgərlərin bir dəqiqəlik sükutla yad edilməsi və İstiqlal Marşının oxunması ilə başlayıb”.
Məlumata əsasən M.A.Ersoy və A.Metan, xüsusilə müharibə və fəlakət bölgələrində nəşriyyat və jurnalistika ilə bağlı bilik və təcrübələrini bölüşüblər: “Konfransın sonunda səhnəyə dəvət edilən O.Zolan, əsrin fəlakəti olaraq xarakterizə etdiyi mərkəzi Kahramanmaraş olan zəlzələlərdən sonra Denizli Böyükşəhər Bələdiyyəsinin Hatay və İskəndərunda həyata keçirdiyi işlərdən danışıb. Çıxışdan sonra bələdiyyə başqanı O.Zolan Mehmet Akif Ersoya və Adem Metana üzərində Denizli xoruz fiqurunun əks olunduğu postament hədiyyə edib”.
