Hüseyn Büyükfırat: Məqsəd Türkiyə və Azərbaycanda olan şəhid ailələrini bir-biri ilə tanış etmək, onların ortaq acılarını paylaşmaq, cəmiyyət arasında ortaq platforma yaratmaqdır
BAYRAQDAR MEDİA – Xəbər verdiyimiz kimi qardaş Türkiyədən bir qrup şəhid yaxınları və qazi azərbaycanlı şəhid ailələri ilə görüşmək, işğaldan azad edilmiş torpaqları ziyarət etmək üçün Azərbaycana səfər edib.
Ötən həftə başlayan səfər Türkiyə-Azərbaycan İş Adamları və Sənayeçiləri Dərnəyinin (TÜİB) və Azərbaycan Müdafiə Nazirliyinin təşkilatçılığı ilə reallaşıb.
Səfər çərçivəsində qonaqların Şəhidləri xiyabanını və Fəxri xiyabanı ziyarət etməsi barədə də məlumat vermişdik.
Bu, iki qardaş ölkə və xalq arasında əlaqələrin daha da dərinləşməsinə xidmət edir
Yanvarın 12-də isə TÜİB İctimai Birliyinin təşkilatçılığı ilə Bakıda Türkiyə və Azərbaycan şəhid ailələrinin iştirakı ilə səhər yeməyi tədbiri keçirilib.
TÜİB-dən BAYRAQDAR MEDİA-ya verilən məlumata görə, tədbirdə Bakıda səfərdə olan Türkiyə şəhidlərinin ailələri, Türkiyə Savaş Əlili, Qazilər, Şəhid Dul və Yetimləri Dərnəyinin üzvləri, Azərbaycandan olan 20-dək şəhid ailələri üzvləri, o cümlədən Azərbaycan Müdafiə Nazirliyinin rəsmiləri, millət vəkilləri Ramil Həsən və Vüqar İskəndərov, Dövlət Sosial Müdafiə Fondunun sədr müavini Mətin Əsgər, TÜİB-in rəhbərliyi və üzvləri, eləcə də digər qonaqlar iştirak edib.
Mərasimi giriş sözü ilə Müdafiə Nazirliyi Şəxsi Heyət Baş İdarəsi Qadınlar və hərbi qulluqçuların ailələri ilə iş üzrə şöbəsinin müdiri Zümrüd Səmədova açıb. Z.Səmədova bu səfərin iki qardaş ölkə və xalq arasında əlaqələrin daha da dərinləşməsinə xidmət edəcəyini bildirib.
“Qardaş ailə” layihəsinə aparan yol
Sonra çıxış edən TÜİB sədri Hüseyn Büyükfırat deyib ki, tədbirin keçirilməsində məqsəd Türkiyə və Azərbaycanda olan şəhid ailələrini bir-biri ilə tanış etmək, onların ortaq acılarını paylaşmaq, cəmiyyət arasında ortaq platforma yaratmaqdır. O, həm Azərbaycanda, həm də Türkiyədə şəhid ailələrinə, o cümlədən qazilərə xüsusi diqqət və qayğı göstərildiyini bildirib.
Vurğulanıb ki, elə Hüseyin Büyükfıratın Milli Məclisin deputatı Ramil Həsənlə birgə başlatdıqları “Tək millət – tək ürək” aksiyasına verilən dəstək də bunu bir daha təsdiqlədi.
Çıxışda xatırladılıb ki “Tək millət – tək ürək” Beynəlxalq Humanitar Qardaşlıq Platforması çərçivəsində şəhid və qazi ailələrinin övladlarının Türkiyənin universitetlərində burslu (təqaüdlə) təhsil almaları üçün müvafiq addımlar atılıb. Bu təşəbbüs özlüyündə daha bir mütərəqqi ideyanın irəli sürülməsinə də səbəb olub. Belə ki, “Tək millət – tək ürək” Beynəlxalq Humanitar Qardaşlıq Platforması çərçivəsində İkinci Qarabağ müharibəsində şəhid olan mayor İlkin Əhədzadə və pilot mayor Abbas Qasımovun ailələrinin Sivas və Şanlurfaya səfərləri təşkil edilib. Bu səfər çərçivəsində isə H.Büyükfırat tərəfindən daha bir layihə, “Qardaş ailə” layihəsi ideyası irəli sürülüb.
Qeyd edilib ki, “Qardaş ailə” layihəsi çərçivəsində şəhid ailəlırinin qarşılıqlı səfərləri təşkil edilib. 2022-ci ilin son günlərində “Qardaş ailə” layihəsi çərçivəsində Azərbaycana maraqlı bir səfər də reallaşıb. Şanlıurfa Böyükşəhər Bələdiyyəsinin başqanı Zeynel Abidin Beyazgül və Haliliye Bələdiyyəsinin başqanı Mehmet Canpolat şəhid mayor İlkin Əhədzadə və pilot mayor Abbas Qasımovun ailələrini ziyarət ediblər.
TÜİB sosial layihələrin icrasında bundan sonra da yaxından iştirak edəcək
H.Büyükfırat TÜİB olaraq sosial layihələrin icrasında bundan sonra da yaxından iştirak edəcəklərini bildirib.
Mərasimdə həmçinin millət vəkillər Ramin Həsən, Vüqar İskəndərov, Dövlət Sosial Müdafiə Fondunun sədr müavini Mətin Əsgər, Türkiyə Müharibə Əlilləri, Şəhidlər və Yetimlər Dərnəyi Bursa Şöbəsinin sədri Metin Şenol və digər natiqlər çıxış edərək bu cür səfərlərin əhəmiyyətinə toxunublar.
Qeyd edək ki, qonaqlar Qarabağa səfər edib, həmçinin Türkiyənin Azərbaycandakı səfiri Cahit Bağcı tərəfindən səfrilikdə qəbul ediliblər.
Türkiyə-Azərbaycan İş Adamları və Sənayeçiləri (TÜİB) İctimai Birliyinin təşkilatçılığı ilə yanvarın 12-də Bakıda Türkiyə və Azərbaycan şəhid ailələrinin iştirakı ilə səhər yeməyi tədbiri keçirilib. pic.twitter.com/GB1VCVpfnm
— TÜİB (@tuibaz) January 14, 2024
