BAYRAQDAR MEDİA – Azərbaycan Milli İncəsənət Muzeyi fiziki məhdudiyyətli uşaq və gənclərin muzey həyatına, sosial və mədəni mühitə cəlb edilməsi istiqamətində Uşaq İnkişaf Mərkəzi ilə birlikdə “İstedadın çalarları” adlı yeni layihəyə başlayıb.
Bu haqda xəbər BAYRAQDAR MEDİA-ya sözügedən Muzeydən daxil olub.
Xəbərdə bildirilir ki, “yanvarın 10-da layihənin ilk təqdimatı keçirilib. Geniş ictimaiyyət nümayəndələri, media mənsublarının iştirakı ilə keçirilən tədbirdə Azərbaycanda Daun sindromlu yeganə tarzən Bəhram Rəhimli bu musiqi alətində ifa etdiyi mahir ifaları ilə yadda qalıb. Tədbirdə gənc rəssamlar – Fuad Musayev və Aytac Quliyeva tərəfindən 3 nömrəli Respublika xüsusi internat məktəbinin uşaqları üçün ustad dərsi keçirilib. Konsert proqramında Qara Qarayev adına Mərkəzi İncəsənət Məktəbinin əlaçı şagirdi, bir sıra müsabiqələr laureatı Jalə Musayeva piano musiqiləri səsləndirib. Təşkilatçılar tərəfindən inklüziv layihələr həyata keçirən digər mərkəzlərin də bu layihəyə qoşulmasının arzuolunan olduğu vurğulanıb”.
Qeyd edək ki, sağlamlıq imkanları məhdud olan uşaq və gənclərin yaradıcı qabiliyyətlərinin üzə çıxarılması, dəstəklənməsi, onların cəmiyyətdə tanıdılması məqsədi daşıyan layihə il ərzində, hər ay olmaqla keçiriləcək.
