BAYRAQDAR MEDİA – Bu yaxınlarda BMT Baş Assambleyası Türkmənistanın təşəbbüsü ilə nəqliyyat və enerji ilə bağlı iki Qətnamə qəbul edib. Türkmənistan Nazirlər Kabineti yanında Nəqliyyat və Rabitə Agentliyindən bildirilib ki, bu Qətnamələr BMT-nin 6 rəsmi dilində – ingilis, ərəb, ispan, çin, rus və fransız dillərində yayılıb.
Bu barədə turkmenportal.com məlumat yayıb.
Bildirilib ki, “dünyanın 47 ölkəsi “Dayanıqlı inkişaf məqsədlərinə nail olmaq üçün bütün nəqliyyat növləri arasında əlaqələrin gücləndirilməsi” Qətnaməsini imzalayıb. 38 ölkə isə “Dayanıqlı inkişafın təmin edilməsində etibarlı və dayanıqlı enerji əlaqələrinin əsas rolu” Qətnaməsini dəstəkləyib və həmmüəllifi olub. Nəqliyyat sektorunda əməkdaşlığa dair beynəlxalq sənəd 2026-2035-ci illəri “Dayanıqlı Nəqliyyat Onilliyi” elan edir. Qətnamə müəllifləri BMT-nin Dayanıqlı Nəqliyyat üzrə 3-cü Baş Assambleyasının çağırılması məsələsini nəzərdən keçirməyə və bu sahədə beynəlxalq əməkdaşlığı inkişaf etdirməyə dəvət edirlər”.
Məlumatda deyilir ki, sənədə əsasən, cari il noyabrın 24-də keçiriləcək Ümumdünya Dayanıqlı Nəqliyyat Günü münasibətilə əsas tədbirlərin Türkmənistanda keçirilməsi planlaşdırılır: “İkinci qətnamə dünya iqtisadiyyatının üzləşdiyi enerji risklərinin aradan qaldırılmasında beynəlxalq ictimaiyyətin səylərini birləşdirməyə yönəlib. Xüsusilə, sənəd enerji resurslarının transsərhəd ötürülməsinin sabitliyini və etibarlılığını təmin etməyə çağırır. Həmçinin, hamı üçün etibarlı, sabit və müasir enerji resursları ilə təmin edilməsində hərtərəfli davamlı inkişaf məqsədlərinə nail olmaq üçün 2026-cı ildə Türkmənistanda “Hamı üçün davamlı enerji” mövzusunda 7-ci konfransın keçirilməsi təklif olunur. Bu Qətnamədə BMT Baş katibinin enerji məsələlərinə həsr olunmuş növbəti hesabatının cari ilin sentyabrında hazırlanması təklif edilir”.
