Son yeniləmə: 29 Dekabr 2023 10:48
III “Qardaşlaşmış Qarabağ Məktəbləri” Qış düşərgəsi yekunlaşıb
BAYRAQDAR MEDİA – Azərbaycan Diasporuna Dəstək Fondu ilə“Zəfər” Şəhid Ailələrinə Dəstək İctimai Birliyinin birgə təşkil etdiyi 21-27 dekabr 2023-cü il tarixləri aralığında reallaşan III “Qardaşlaşmış Qarabağ Məktəbləri” Qış düşərgəsi yekunlaşıb. Düşərgənin sonunda Fond tərəfindən iştirakçılara hədiyyə və sertifikatlar təqdim edilib.
Bu barədə BAYRAQDAR MEDİA-ya dekabrın 29-da Fonddan məlumat verilib.
Bildirilib ki, “düşərgədə Qazaxıstanda fəaliyyət göstərən “Həftəsonu Qarabağ məktəbi”nin şagirdləri ilə Azərbaycan Respublikasının ərazi bütövlüyünün bərpası zamanı müxtəlif vaxtlarda şəhid olmuş igid qəhrəmanlarımızın övladları iştirak ediblər. Bu bir həftə ərzində şagirdlər maraqlı və unudulmaz zaman keçiriblər”.
Məlumata görə, Ümummilli lider Heydər Əliyevin əziz xatirəsinə həsr olunmuş düşərgdə iştirakçılar Fəxri Xiyabanı və Şəhidlər Xiyabanını ziyarət ediblər: “Daha sonra “İçərişəhər” Dövlət Tarix-Memarlıq Qoruğu və Heydər Əliyev Mərkəzi ilə tanış olublar. Bir çox məhşur simalar – Miri Yusif, Rafael İsgəndərov, Hacı Əliyev düşərgəyə qonaq qismində qatılıblar. Həmçinin düşərgə iştirakçıları “Qarabağ FK” futbol komandasının bazasında olaraq futbolçularla və komandanın Baş məşqçisi Qurban Qurbanovla görüşmək, şəkil çəkdirmək imkanı əldə ediblər. Düşərgənin 5-ci günündə isə Amburan Mallda yerləşən Cinema Plusda və Sea Breeze Resort istirahət mərkəzində olaraq onlar üçün hazırlanmış əyləncəli proqramda iştirak ediblər. Xatırladaq ki, layihənin ideya müəllifi İsveçrədə yaşayan və “İsveçrədəki azərbaycanlıların mədəniyyət mərkəzi” nin rəhbəri Qasım Nəsirovdur. Həmçinin Qasım Nəsirov düşərgədə təlimçi qismində də iştirak etmişdir”.
Xəbərdə o da vurğulanıb ki, layihənin icrasına ötən ildən başlanılıb: “Layihə çərçivəsində İsveçrədə fəaliyyət göstərən həftəsonu məktəbinin şagirdləri ilə məcburi köçkün və şəhid ailələrinin övladları 18-24 iyul 2022-ci il tarixində Bakının Xəzər rayonunun Şüvəlan qəsəbəsində yerləşən “Cırtdan” Respublika Uşaq İstirahət və Sağlamlıq Mərkəzində təlimlər keçiblər. 7-13 avqust 2023-cü il tarixində isə düşərgənin 2-ci hissəsi İsveçrədə keçirilmişdir. Düşərgənin növbəti mərhələsinin Qazaxıstanda keçirilməsi nəzərdə tutulmuşdur. III “Qardaşlaşmış Qarabağ Məktəbləri” Qış düşərgəsinin tərəfdaşları olan Azərbaycan Respublikasının Daxili İşlər Nazirliyinə və onun “XƏZRİ” istirahət və sağlamlıq mərkəzinə, Sirab ASC, “İçərişəhər” Dövlət Tarix-Memarlıq Qoruğu, Heydər Əliyev Mərkəzi, Cinema Plus, Sea Breeze Resort istirahət mərkəzi və Vətən Mərdəkan restoranına təşəkkürümüzü bildiririk”.
