Son yeniləmə: 27 Dekabr 2023 18:43
Dr. Yücel Karauz: 2023-cü ilin sentyabrında Azərbaycanın həyata keçirdiyi lokal xarakterli antiterror tədbirləri isə bi hadisələrin başında gəlir
BAYRAQDAR MEDİA – “2023-cü ildə türk dünyasında yadda qalan, tarixə düşəcək bir sıra hadisə baş verdi. Lakin bunların içərisində bir tarixi hadisə var ki, yüz illər keçsə də nə unudulmayacaq, nə də öz dəyərini itirməyəcək. Söhbət 2023-cü ilin sentyabrında Azərbaycanın həyata keçirdiyi lokal xarakterli antiterror tədbirlərindən gedir. Məhz bu tədbirlər nəticəsində Azərbaycan bütün ərazilərində suverenliyini tam bərpa etdi”.
Bunu BAYRAQDAR MEDİA-ya özəl açıqlamasında Türkiyənin Azərbaycandakı sabiq hərbi attaşesi, ehtiyatda olan general Dr.Yücel Karauz deyib.
O, qeyd edib ki, bu həm Azərbaycan, həm də bütövlükdə türk dünyası baxımından mühüm əhəmiyyət kəsb edir: “Hesab edirəm ki, bu, 2023-cü ili türk dünyası üçün yaddaqalan edən hadisələrin başında gəlir. Onu da deyim ki, 2020-ci il 44 günlük Vətən müharibəsində əldə edilən tarixi Zəfər və 2023-cü ilin sentyabrındakı lokal xarakterli antiterror təsdbirləri bütün türk dünyasında qürur və sevinclə qarşılanıb. Bu uğurlar türk dünyasının inteqrasiyasının dərinləşməsinə, türk dövlətlərinin daha sıx və açıq şəkildə bir-birini dəstəkləməsinə təkan verib”. Dr.Y.Karauz deyib ki, eyni zamanda, 2020-ci ildə Ermənistanın işğalından azad edilən Şuşanın 2023-cü ildə türk dünyasının mədəniyyət paytaxtı olması da başa çatan ili yaddaqalan etdi: “İl boyu Şuşada türk dünyasının mədəniyyət və incəsənəti ilə bağlı çoxsaylı tədbirlər keçirildi. Şuşa türk dünyasını yenidən bir araya gətirdi”.
.
