Son yeniləmə: 21 Dekabr 2023 18:28
Azərbaycan-Türkiyə İnvestisiya Forumu çərçivəsində nəqliyyat və logistika mərkəzlərinin rolu müzakirə edilib
BAYRAQDAR MEDİA – Azərbaycan-Türkiyə İnvestisiya Forumu çərçivəsində “İkitərəfli ticarət dövriyyəsinin artırılmasında nəqliyyat və logistika mərkəzlərinin rolu” mövzusunda panel iclası təşkil edilib.
BAYRAQDAR MEDİA-ya İqtisadiyyat Nazirliyindən verilən məlumata görə, panel iclasında Dövlət Gömrük Komitəsinin sədri Şahin Bağırov, Türkiyənin ticarət nazirinin müavini Özgür Volkan Ağar, rəqəmsal inkişaf və nəqliyyat nazirinin müavini Rəhman Hümbətov, “İkra Logistik”in baş direktoru Akın Konyar, Kiçik və Orta Biznesin İnkişafı Agentliyinin İdarə Heyəti sədrinin birinci müavini Natiq Həsənov, Uluslararası Nakliyecilər Dərnəyinin sədr müavini Fatih Şener tədbir çərçivəsində müzakirələrdə iştirak ediblər.
Azərbaycan Nəqliyyat Ekspeditor Şirkətləri Assosiasiyasının sədri Kamran Həbibovun moderatorluğu ilə keçirilən tədbirdə ortaq dəyərlərə malik olan iki ölkə arasında dostluq və qardaşlıq münasibətlərinin, strateji müttəfiqliyin əhəmiyyəti vurğulanıb, əməkdaşlıq portfelinin gücləndirilməsi istiqamətləri barədə fikir mübadiləsi aparılıb.
Qeyd olunub ki, “yeni əməkdaşlıq imkanlarının araşdırılması və reallaşdırılması ölkələrimizin iqtisadiyyatının dayanıqlı inkişafına və qlobal iqtisadiyyata sıx inteqrasiyaya mühüm töhfələr verə bilər”.
Panel sessiyada Azərbaycan və Türkiyənin mühüm nəqliyyat qovşaqları üzərində yerləşməsinin, nəqliyyat dəhlizlərinin imkanlarından istifadənin və potensial layihələrin geoiqtisadi əhəmiyyəti vurğulanıb.
Bildirilib ki, “tədbirdə dövlət başçılarının qarşıya qoyduqları hədəflərə çatmaq üçün qarşılıqlı ticarətin daha da inkişafı istiqamətində qarşılıqlı tədarükün artırılmasında liman infrastrukturunun potensial imkanları, nəzarət məntəqələrinin modernləşdirilməsi, Orta Dəhlizin imkanlarından səmərəli istifadə, Preferensial Ticarət Sazişi üzrə qarşılıqlı ticarətin vəziyyəti və inkişaf perspektivləri, nəqliyyat sahəsi üzrə Azərbaycana investisiya yatırılması imkanları, nəqliyyat və logistika dəhlizlərinin KOB-ların inkişafında rolu mövzusunda müzakirələr aparılıb”.
