BAYRAQDAR MEDİA – Dekabrın 18-19-da Mərakeşin paytaxtı Rabat şəhərində İslam Dünyası Təhsil, Elm və Mədəniyyət Təşkilatı ICESCO-nun nəzdində fəaliyyət göstərən İslam Dünyası İrs Komitəsinin (IWHC) 11-ci iclası keçirilib.
Bu haqda Mədəniyyət Nazirliyinin yaydığı xəbərdə deyilir.
Xəbərdə bildirilir, “Komitə üzvlərinin qərarı ilə ölkəmizin zəngin mədəniyyətini əks etdirən (Yallı (köçəri, tənzərə) Naxçıvanın ənənəvi qrup rəqsləri, Dolma hazırlanması və paylaşılması ənənəsi, mədəni kimliyin göstəricisi, Pəhləvanlıq mədəniyyəti, ənənəvi zorxana oyunları, idman növləri və güləş, Azərbaycan muğamı, Lahıc misgərlik sənəti, Çövkən – ənənəvi Qarabağ atüstü oyunu, Azərbaycan aşıq sənəti, Kəlağayı düzəldilməsi və geyinməsi ənənəvi incəsənəti və onun simvolizmi, Tar ifaçılıq sənəti və onun hazırlanma ustalığı, Azərbaycanda xalça toxuculuğu ənənəvi sənəti) 10 qeyri-maddi mədəni irs nümunəsi İslam Dünyası İrs Siyahısına daxil edilib.
Daha sonra xəbərdə deyilir ki, “dekabrın 19-da ICESCO-nun qərargahında Mərakeş rəsmiləri, təşkilata üzv ölkələrin diplomatik nümayəndəlikləri və İslam Dünyası İrs Komitəsi üzvlərinin də iştirak etdiyi mərasimdə Azərbaycan Mədəniyyət Nazirliyinin hazırladığı namizədlik faylları əsasında qeyd olunan elementlərin İslam Dünyası İrs Siyahısına daxil edilməsini təsdiq edən sertifikat ICESCO-nun baş direktoru Salim əl-Malik tərəfindən Azərbaycanın bu qurumdakı daimi nümayəndəsi Nazim Səmədova təqdim edilib. IWHC-nin sözügedən qərarı ilə Azərbaycan xalqına məxsus bu qeyri-maddi mədəni irs elementlərinin mühüm dəyəri vurğulanıb və mədəni irsin qorunması, mühafizəsi və davamlılığının təmin edilməsinin vacibliyi nümayiş etdirilib”.
Qeyd edək ki, Azərbaycanın üzvü olduğu ICESCO ilə əməkdaşlığında mədəni irsin qorunması mövzusu mühüm yerlərdən birini tutur.
Xatırladaq ki, 2019-cu ildə Azərbaycandan İçərişəhər (Qız qalası və Şirvanşahlar saray kompleksi ilə birlikdə), Şəkinin tarixi mərkəzi (Xan sarayı ilə birlikdə) və Qobustan qayaüstü rəsmləri də İslam Dünyası İrs Siyahısına daxil edilib. Bununla da Azərbaycanın İslam Dünyası İrs Siyahısındakı mədəni irs nümunələrinin sayı 15-ə çatıb.
