BAYRAQDAR MEDİA – Dekabrın 20-də YARAT Müasir İncəsənət Məkanında “Regional İnkişaf” İctimai Birliyi tərəfindən həyata keçirilən Azad Mirzəcanzadə inkişaf proqramı çərçivəsində “Yaradıcı sənayedən necə pul qazanmaq olar?” mövzusu üzrə panel müzakirə aparılacaq.
Bu haqda YARAT-ın yaydığı xəbərdə qeyd olunur.
Xəbərdə deyilir ki, “tədbirin məqsədi yeni imkanlardan istifadə etmək bacarığı, cari problemlər üçün yaradıcı həllər tapa bilən, davamlı gələcəyə doğru səy göstərə bilən, tənqidi düşüncə və çevik, innovativ yanaşmalara malik olan 18-35 yaş arası daha çox fəal və dəyişikliklərə açıq insanların proqrama qatılması üçün ətraflı məlumat verməkdir. Panelin qonaqları “Azərxalça” ASC-nin kreativ direktoru Əsmər Babayeva, Bakı Media Mərkəzinin içraçı direktoru Orman Əliyev və Əməkdar rəssam Rəşad Ələkbərovdur”.
Moderatoru YARAT-ın təhsil şöbəsinin meneceri Mələk Bayramlı olan müzakirə saat 19:00-da başlayacaq.
