BAYRAQDAR MEDİA – Dekabrın 13-də Laçın rayonundakı Ədalət Məmmədov adına Zabux kənd tam orta məktəbi fəaliyyətə başlayıb.
Bu haqda xəbər BAYRAQDAR MEDİA-ya Elm və Təhsil Nazirliyinin (ETN) mətbuat xidmətindən daxil olub.
Xəbərdə bildirilir ki, “bununla əlaqədar təşkil olunan tədbirdə Prezidentin Laçın rayonunda xüsusi nümayəndəliyinin əməkdaşı Qalib Abasov, Şərqi Zəngəzur Regional Təhsil İdarəsinin (RTİ) müdiri Fuad Bədəlov, Laçın rayonu üzrə təhsil sektorunun müdiri Nicat Həsənov, məktəb kollektivi, valideynlər, həmçinin digər qonaqlar iştirak ediblər. Əvvəlcə Ulu öndər Heydər Əliyevin və şəhidlərin əziz xatirəsi birdəqiqəlik sükutla yad olunub. Tədbirdə F.Bədəlov çıxış edərək məktəb binasının açılışı münasibətilə təhsil işçilərini, şagird və valideynləri təbrik edib, onlara uğurlar arzulayıb”.
Sonra tədbir iştirakçıları təhsil müəssisəsində yaradılmış şəraitlə tanış olublar.
Bildirilib ki, məktəbdə ilkin olaraq 35 şagird təhsilə cəlb edilib. 176 şagird yerlik ikimərtəbəli məktəb binasında 11 sinif otağı, 2 laboratoriya, gənclərin çağırışaqədərki hazırlığı və tibb otağı, kitabxana, idman, həmçinin 105 yerlik akt zalı, yeməkxana, bufet mövcuddur.
Qeyd edək ki, Prezident İlham Əliyev və birinci xanım Mehriban Əliyeva avqustun 26-da Laçın rayonunun Zabux kəndində görülmüş işlərlə tanış olub və burada kənd sakinləri ilə görüşüb.
Xatırladaq ki, İ.Əliyev ötən il sentyabrın 22-də Laçın rayonu Zabux kənd tam orta məktəbinin binasının layihələndirilməsi, əsaslı təmiri və bərpası ilə bağlı tədbirlər haqqında Sərəncam imzalayıb.
