Son yeniləmə: 12 Dekabr 2023 09:52
Cemal Yanğın: Məhz Ulu Öndərin bizə göstərdiyi yol, həmçinin Prezident İlham Əliyevin verdiyi hərtərəfli dəstək sayəsində uğurlu işlər görürük
BAYRAQDAR MEDİA – “Ümummilli Lider Heydər Əliyevin əziz xatirəsini ehtiramla anırıq. Onun bizə göstərdiyi yol azad bazar iqtisadiyyatına ən önəmli və uğurlu keçidi təmin etdi. Marksist bir iqtisadi sistemdən azad bazar iqtisadiyyatına qəfil keçid dünyada ən çətin işlərdən biri idi. Lakin Ulu Öndərin peşəkarlıqla, yüksək ustalıqla həyata keçirdiyi siyasət nəticəsində Azərbaycan bu keçidi qısa zaman ərzində reallaşdıra bildi”.
Bunu BAYRAQDAR MEDİA-ya özəl açıqlamasında Azərbaycan Türkiyə İş Adamları Birliyinin (ATİB) keçmiş sədri Cemal Yanğın deyib.
O, qeyd edib ki, Azərbaycan bu keçidi reallaşdırarkən torpaqlarının 20 faizi işğal altında idi: “Lakin məhz Ulu Öndər Heydər Əliyevin rəhbərliyi ilə hərtərəfli düşünülmüş və böyük ustalıqla reallaşdırılan siyasət nəticəsində Azərbaycan bu keçidi reallaşdıra bildi. Dolayısı ilə biz də bu dahi şəxsiyyətin öyrətdiklərindən istifadə edərək uğurlar qazanmışıq”.
C.Yanğın vurğulayıb ki, Ulu Öndər Heydər Əliyevin layiqli davamçısı Prezident İlham Əliyev də iş adamlarına hərtərəfli dəstək göstərir: “Mən Ulu Öndər Heydər Əliyevin xatirəsini rəhmətlə anır, Prezident İlham Əliyevə dərin minnətdarlıq edirəm. Məhz Ulu Öndərin bizə göstərdiyi mənəvi dəstək, göstərdiyi yol, həmçinin Prezident İlham Əliyevin verdiyi hərtərəfli dəstək sayəsində uğurlu işlər görürük. Məhz ötən müddət ərzində reallaşdırılan siyasət nəticəsində Azərbaycan iqtisadi baxımdan gücləndi və regionun lider ölkəsi oldu”.
