Tennur Türk: Türkiyə-Azərbaycan- KKTC iş ortaqlığı üçün nə lazımdırsa etməyə hazırıq
BAYRAQDAR MEDİA – “Azərbaycana ilk səfərim unudulmaz anlar, xoş xatirələrlə yadda qalacaq. Məni Bakıya səfərə dəvət etdiyi üçün iş ortağımız İlhami bəyə dərindən minnətdarlıq edirəm”.
Bunu bu yaxınlarda Bakıda səfərdə olan “Bursa Yüzyıl Gayrimenkul” şirkətinin qurucusu Tennur Türk BAYRAQDAR MEDİA-ya özəl açıqlamasında deyib.
Tennur xanım Kıbrıs Türk İş İnsanları Derneğinin (İŞAD) İdarə Heyətinin üzvü və Azərbaycan üzrə təmsilçisi, KKTC-nin “Wotmax Estate” şirkətinin direktoru İlhami Bilgenin dəvəti ilə Azərbaycanda səfərdə olub.
İxtisasça tibb bacısı olan T.Türk üç ildən çoxdur ki, şəxsi bizneslə məşğuldur: “Bura Bursadan gəlmişəm. Mən özüm ixtisasca tibb bacısıyam. Amma artıq bu sahədə təqaüdə ayrılmışam. Üç il yarımdır ki, şəxsi bizneslə məşğulam və əmlak dünyasındayam. Yəni əmlak ticarəti ilə məşğulam. Dediyim kimi KKTC-dən İlhami bəylə iş ortaqlığımız var. Bakıya da onun dəvəti ilə gəlmişəm. Bakı məni həddindən artıq valeh etdi”.
Müsahibimiz, “Buranın gözəlliyi, insanlarının mehriban və qonaqpərvərliyi deyərdim ki, dünyanın heç bir yerində yoxdur. Küçədə gəzərkən sadə insanlar bizim Türkiyədən gəldiyimiz biləndə yaxınlaşdılar, mehriban söhbət etdilər, hətta bizi evlərinə qonaq dəvət etdilər. Taksiyə otururuq, sürücü deyir ki, “Türkiyə bizim qardaşımızdır. Gediş haqqını verməsəniz də olar”. Bir sözlə, Bakı, Azərbaycan məndə inanılmaz gözəl və ülvü hisslər, xoş təəssüratlar oyatdı. Arzum budur ki, bu istiqanlılığı daim qoruyasınız. Dünya insanlığının azərbaycanlılardan öyrənməli olduğu çox şeylər var. İnşallah yenə də Bakıya gəlmək istəyirəm. Yəqin ki, bu dəfə də övladlarımla birgə gələcəyəm”.
Azərbaycanda da ortaq fəaliyyətin qurula bilinməsi məsələsinə gəlincə, T.Türk aşağıdakıları bildirib: “Öncəliklə bizlər Türkiyə Cümhuriyyətinin ilkələrinə, Mustafa Kemal Atatürkə bağlı insanlarıq. Azərbaycanı da çox sevirik. Azərbaycanla Türkiyə xoş gündə də, dar günündə də bir-birinin yanındadır. Bunun son illər dəfələrlə şahidi olmuşuq. Eyni zamanda türk dövlətlərinin güclü olması ümumilikdə türk dünyasının güclü olması deməkdir. Bu da bizim əsas arzumuzdur. Bu istiqamətdə ortaq işbirliyi də vacibdir. Biz bu məsələdə üzərimizə düşən vəzifələri böyük şərəflə yerinə yetirməyə hazırıq. Türkiyə-Azərbaycan- KKTC iş ortaqlığı üçün də nə lazımdırsa etməyə hazırıq”.
