BAYRAQDAR MEDİA – BDU-nun İnformasiya və sənəd menecmenti fakültəsinin tələbələri “Kitabxana kataloqları” fənni üzrə AMEA-nın Mərkəzi Elmi Kitabxanasında əyani tədris keçiblər.
Bu haqda xəbər BAYRAQDAR MEDİA-ya MEK-dən daxil olub.
Xəbərdə bildirilir ki, “fakültənin dosenti Rəşad Qardaşovun rəhbərliyi ilə tələbələr kitabxananın Komplektləşdirmə, Kataloqlaşdırma, Avtomatlaşdırma və proqram təminatı şöbələrinin fəaliyyəti, kitabxana sistemində ilk olan Qarabağ müharibəsi qəhrəmanları fondu ilə yaxından tanış olublar. MEK-in Komplektləşdirmə şöbəsinin rəhbəri Gülnar Məmmədova kitabxanada tətbiq edilən proseslə tələbələri ətraflı məlumatlandırıb”.
Daha sonra xəbərdə, “gələcəyin mütəxəssisləri kitabxanaya daxil olan ədəbiyyatın uçotu və işlənməsi, təsnifləşdirilməsi və kataloqlaşdırılması, kitabxana fondundan çıxarılmış ədəbiyyatlar üzrə aktların tərtibi, cari daxil olan sənədlərin və retrospektiv sənədlərin elektron kataloqlaşdırması və biblioqrafik təsvirlərinin yaradılması, elm sahələri üzrə sistemləşdirilməsi və indeksləşdirilməsi kimi işlərin aparılmasına əyani baxıblar. Həmçinin kitabxanada tətbiq edilən IRBIS64+AKIS proqramı və onun texnoloji proseslərinin tənzimlənməsi haqqında məlumat alan tələbələr sözügedən proqram vasitəsi ilə elektron və ənənəvi kartoçka yaradıblar” deyə bildirilir.
Qeyd edək ki, kitabxanada keçirilən dərslər təcrübə mübadiləsi ilə yanaşı, mütaliə alışqanlığının formalaşması və inkişafı baxımından da böyük əhəmiyyət kəsb edir.
