BAYRAQDAR MEDİA – Əmək və Əhalinin Sosial Müdafiəsi Nazirliyinin tabeliyindəki Dövlət Məşğulluq Agentliyinin təşkilatçılığı ilə dekabrın 19-da üçüncü dəfə Azərbaycan Karyera İnkişaf Forumu keçiriləcək.
Bu barədə BAYRAQDAR MEDİA-ya Agentlikdən məlumat verilib.
Bildirilib ki, “Forum “Yenilikləri fürsətə çevir!” devizi ilə təşkil olunacaq. Tədbirdə karyera inkişafı üzrə yerli və qlobal nailiyyətlər, müasir yanaşmalar, rəqabətli mühitdə kadr ehtiyatının formalaşdırılması üçün effektiv ali təhsil strukturunun qurulması mexanizmləri, daim dəyişən dünyada tələb olunan bacarıqlar və karyera sahəsində müasir tələb-təklif trendləri müzakirə olunacaq”.
Məlumata əsasən Forumda karyera məsləhətçiləri, təhsil ekspertləri, dövlət və özəl sektorun nümayəndələri, inkişaf mentorlarının iştirak edəcək və müxtəlif mövzularda təqdimatlar edəcək: “3 paneldən ibarət olacaq Forumda yerli ekspertlərlə yanaşı, karyera inkişafı üzrə tanınmış beynəlxalq mütəxəssislərin də iştirakı gözlənilir. Ölkəmizdə karyera inkişafının müzakirəsi sahəsində ən qabaqcıl təcrübələrdən sayılan Azərbaycan Karyera İnkişaf Forumunda birgə müzakirələr, sual-cavab sessiyaları və qruplar formatında görüşlər təşkil ediləcək. Azərbaycan Karyera İnkişaf Forumuna iştirakçı qismində qatılmaq istəyən şəxslər üçün yaxın günlərdə qeydiyyata başlanacaq”.
