Son yeniləmə: 27 Noyabr 2023 09:18
BAYRAQDAR MEDİA – Milli Məclisin deputatları – Meksika ilə parlamentlərarası əlaqələr üzrə işçi qrupunun rəhbəri Jalə Əliyeva və Elşad Mirbəşiroğlu Meksikaya işgüzar səfər ediblər. Səfər çərçivəsində onlar Xalisko ştatının Tonala şəhərində təşkil olunmuş, iki ölkə arasında ticari-iqtisadi əlaqələrin inkişafına həsr olunmuş təqdimatda iştirak ediblər.
Bu barədə BAYRAQDAR MEDİA-ya Azərbaycanın Meksikadakı səfirliyindən məlumat verilib.
Bildirilib ki, “Tonala şəhərinə səfər zamanı Milli Məclisin nümayəndə heyətini Azərbaycanın Meksikadakı səfiri Məmməd Talıbovla yanaşı, Meksika-Azərbaycan parlamentlərarası dostluq qrupunun sədri Alberto Viyeqas və qrupun üzvü Elba Vixil, eləcə də tanınmış meksikalı ictimai-siyasi xadim, deputat Yeidkol Polevnski müşayiət ediblər. Tonala Ticarət Palatası tərəfindən xüsusi olaraq Milli Məclisin nümayəndə heyəti üçün təşkil olunmuş tədbirdə şəhərin təklif etdiyi çoxvektorlu ixrac və xidmət imkanlarına dair təqdimatlar keçirilib. Qonaqlara özəl olaraq hazırlanmış və Azərbaycan dilinə tərcümə edilmiş video materiallar nümayiş etdirilib, həmçinin iki ölkə arasında iqtisadiyyat, ticarət, investisiya və qarşılıqlı maraq doğuran digər sahələrdə əməkdaşlıq əlaqələrinin daha da inkişafı üçün geniş potensial olduğu vurğulanıb. Azərbaycan məhsullarının Meksika bazarına çıxarılması, eyni zamanda Meksika istehsalı olan, xüsusilə mədən sənayesi, kənd təsərrüfatı və qida məhsullarının Azərbaycan bazarına daxil olması üçün real danışıqlara başlamaq niyyəti ifadə olunub”.
Məlumata görə, daha sonra Milli Məclisin nümayəndə heyəti “Arevalo Qrup”a məxsus fabrikdə müxtəlif qida məhsullarının istehsal prosesi ilə tanış olub: “Arevalo qida məhsullarının ən yüksək keyfiyyət, gigiyena və təhlükəsizlik standartlarına riayət olunaraq istehsalı ilə seçilən Meksika şirkətlər qrupudur”.
