BAYRAQDAR MEDİA – Qazaxıstanın ev sahibliyi ilə Xəzər dənizinin Hidrometeorologiyası üzrə Koordinasiya Komitəsinin (KASPKOM) videokonfrans formatında 7-ci sessiyası keçirilib.
Bu haqda Ekologiya və Təbii Sərvətlər Nazirliyinin yaydığı xəbərdə deyilir.
Xəbərdə bildirilir ki, “sessiyada Azərbaycanı nümayəndə qismində ETSN yanında Milli Hidrometeorologiya Xidmətinin rəisi Nazim Mahmudov təmsil edib. KASPKOM-a üzv ölkələrin milli hidrometeorologiya xidmətlərinin rəhbərləri hidrometeorologiya sahəsində milli fəaliyyətlərin cari vəziyyəti və perspektivləri barədə maraqlı təqdimatlarla çıxış edib, müvafiq sualları cavablandırıblar”.
Həmçinin, konfransda tərəflər Xəzər dənizinin hidrometeorologiyası sahəsində əməkdaşlıq haqqında Sazişin icrası, KASPKOM çərçivəsində iqlim üzrə işçi qrupun yaradılması, KASPKOM və Tehran Konvensiyası arasında əməkdaşlıq və digər mövzular ətrafında məhsuldar müzakirələr aparıblar. Paralel olaraq KASPKOM-un prosedur qaydaları layihəsi, iqlim bülletenləri, kataloqları, sənədləri də nəzərdən keçirilib.
Görüşün sonunda KASPKOM-un növbəti 8-ci sessiyasının vaxtı və məkanı müəyyənləşdirilib.
Xatırladaq ki, Xəzər dənizinin KASPKOM-un 6-cı sessiyasına 2023-cü ilin 1 mart tarixində Azərbaycan uğurlu ev sahibliyi etmişdi və həmin sessiyada bir çox əhəmiyətli sənədlərin müzakirəsi baş tutmuşdu.
