BAYRAQDAR MEDİA – Azərbaycanda SPECA (BMT-nin Mərkəzi Asiya Ölkələrinin İqtisadiyyatları üçün Xüsusi Proqramı) həftəsi başlayıb. SPECA həftəsi çərçivəsində SPECA Ticarət üzrə İşçi Qrupunun 18-ci iclası keçirilib.
Bu barədə BAYRAQDAR MEDİA-ya İqtisadiyyat Nazirliyindən məlumat verilib.
Bildirilib ki, tədbirdə açılış nitqi ilə iqtisadiyyat nazirinin müavini Səməd Bəşirli çıxış edib.
O, bildirib ki, iclas Mərkəzi Asiyada 2030-cu ilə qədər olan dövr üçün Dayanıqlı İnkişaf Gündəliyinin əsas spektrlərini əhatə edir: “S.Bəşirli ölkəmizdə ticarətin inkişafı istiqamətində atılan addımlar, tranzit-logistika potensialının artırılması, nəqliyyat xidmətlərinin və daşımaların keyfiyyətinin yüksəldilməsi məqsədilə gömrük prosedurlarının rəqəmsallaşdırılması və sadələşdirilməsi istiqamətində islahatlar barədə məlumat verib”.
Məlumat görə, iclas SPECA Ticarət üzrə İşçi Qrupunun sədri, Tacikistanın iqtisadi inkişaf və ticarət nazirinin müavini Ahliddin Nuriddinzodanın sədrliyi ilə keçirilib: “İclasda Proqramın əhatə etdiyi dövlətlərin ticarət sahəsində əlaqələrinin genişləndirilməsi və əməkdaşlıq perspektivlərinin müəyyən edilməsinin əhəmiyyəti vurğulanıb. Qeyd edilib ki, qarşılıqlı faydalı ticarət tərəfdaşlığının inkişaf etdirilməsi milli iqtisadiyyatların şaxəli inkişafına və qlobal iqtisadiyyata sıx inteqrasiyasına mühüm töhfələr verə bilər. Sessiyada SPECA-nın iştirakçısı olan dövlətlər arasında ticarətin asanlaşdırılması, multimodal nəqliyyat və rəqəmsallaşma, milli və regional planvə strategiyalar, həmçinin digər məsələlər nəzərdən keçirilib. Tədbir çərçivəsində İşçi Qrupun qarşıdakı 2-3 il ərzində həyata keçirəcəyi prioritet tədbirlərin müəyyənləşdirilməsi yönündə müzakirə aparılıb”.
Qeyd olunub ki, Ailə, Qadın və Uşaq Problemləri üzrə Dövlət Komitəsi sədrinin müavini Sədaqət Qəhrəmanovanın sədrliyi SPECA Gender və Dayanıqlı İnkişaf Məqsədləri üzrə İşçi Qrupunun “Gender bərabərliyi: SPECA regionunda qlobal bağlantı və transformativ inkişaf üçün katalizator” mövzusunda iclası keçirilib: “İclasda qeyd olunub ki, gender bərabərliyi üzrə birgə səylərlə qadınların iqtisadi imkanlarının artırılmasında mühüm rol oynayacaq regional kommunikasiya mərkəzinin yaradılması əsas məsələlərdəndir. Sessiya çərçivəsində gender məsələlərinin SPECA-nın diqqət mərkəzində saxlanması yolları, qadınların cəmiyyətdə bərabərhüquqlu olmasını təmin etmək üçün qəbul edilmiş təşəbbüs və müsbət təcrübələr, bu sahədə əməkdaşlığın genişləndirilməsi kimi məsələlər müzakirə olunub, təkliflər səsləndirilib”.
