BAYRAQDAR MEDİA – AMEA Mərkəzi Elmi Kitabxanasında Zəfər Gününə həsr olunmuş “Ulu öndər Heydər Əliyevin hərb siyasətinin zəfəri” adlı lektoriya keçirilib.
Lektoriyada millət vəkilləri – Anar İsgəndərov, Musa Qasımlı, Vüqar İskəndərov, Arzu Nağıyev, Prof. Nadir Məmmədli, BAYRAQDAR MEDİA-nın baş redaktoru Azər Həsrət, YAP Yasamal Rayon Təşkilatının sədri Bəxtiyar Nəbiyev, müharibə iştirakçıları, şəhidlərin ailə üzvləri, media nümayəndələri də iştirak edib.
Tədbirin açılışında çıxış edən MEK-in baş direktoru, Prof. Məmməd Əliyev Ulu Öndər Heydər Əliyevin Azərbaycan tarixindəki misilsiz rolu haqqında danışıb. Baş direktor bildirib ki, rəhbəri olduğu kitabxanada artıq üç ildir Heydər Əliyev lektoriyası keçirilir. Budəfəki lektoriyanın Zəfər Gününə həsr olunduğunu qeyd edən professor bu günün tarixinə nəzər salıb, II Qarabağ müharibəsini xatırladıb. O, həmçinin müharibədən sonra MEK-də yaradılmış Qarabağ müharibəsi qəhrəmanları fondu haqqında məlumat verib.
Sonra Prof. Anar İsgəndərov çıxışında Heydər Əliyevin hərbi sahədə gördüyü işləri xatırladıb. Ulu öndəri “nadir şəxsiyyət” adlandıran millət vəkili onun Azərbaycan gənclərini SSRİ-nin nüfuzlu ali məktəblərində təhsil almağa göndərməsinin o dövrdə ən böyük iş olduğunu deyib. Professor 2023-də 100 illiyi qeyd edilən Türkiyə Cümhuriyyəti haqqında da danışıb. Vurğulayıb ki, Azərbaycan öz ərazi bütövlüyünü təmin etməklə Türkiyəyə də töhfə vermiş oldu. A.İsgəndərov çıxışının sonunda “dünyanın ən böyük xoşbəxtliyi qalib gəlməkdir və Azərbaycan da bunu qazandı” deyə qeyd edərək Zəfər Günü münasibəti ilə tədbir iştirakçılarını təbrik edib.
Daha sonra tədbirdə çıxış edənlər – şəhid Nurlan Mustafayevin anası Rəhilə Mustafayeva, millət vəkili, Prof. Musa Qasımlı, millət vəkili Arzu Nağıyev Heydər Əliyevin Azərbaycanda hərbi sahəyə qayğısından, Qarabağ müharibəsində Azərbaycanın qəhrəman oğullarının şücaətindən bəhs edib.
Tədbir zamanı Heydər Əliyevin hərb siyasətinə həsr olunmuş videoçarx nümayiş olunub.
Sonda Ağdam rayonundakı 33 nömrəli tam orta məktəbin şagirdlərinin və musiqi ustalarının vətənpərvərlik mövzusunda ifaları dinlənilib.
