BAYRAQDAR MEDİA – Noyabrın 4-də məktəbəqədər təhsil müəssisələrinə tərbiyəçi-müəllimlərin işə qəbulu üzrə müsabiqənin test imtahanı mərhələsinə başlanılacaq.
Bu haqda Elm və Təhsil Nazirliyinin yaydığı xəbərdə deyilir.
Xəbərdə bildirilir ki, “ümumilikdə ölkə üzrə 17 mərkəzdə təşkil olunacaq imtahanlara 5 min 038 namizəd dəvət edilib. Test imtahanlarında hər bir namizədə məzmun və metodikaya aid 40 sual, pedaqoji və psixoloji yanaşmalara dair 20 sual təqdim edilir. Sualları cavablandırılmaları üçün namizədlərə 120 dəqiqə vaxt ayrılır. Bu mərhələdə tapşırıqların hər biri 1 bal olaraq hesablanacaq. Ümumilikdə 60 ballıq qiymətləndirmə sistemi tətbiq ediləcək. Qaydalara əsasən hər səhv cavablandırılmış test tapşırığı -0,25 bal şəklində hesablanaraq namizədin imtahan nəticəsinə təsir göstərəcək”.
Qeyd edək ki, namizəd şəxsi səhifəsində göstərilən tarix və məkanda imtahanda iştirak etməlidir. Qeydiyyat prosesinə gecikən namizədlər imtahan binasına buraxılmayacaqlar.
