BAYRAQDAR MEDİA – Oktyabrın 26-da Kərkük Kültür Dərnəyi (Ankara) başqanı, Kərküklü yazıçı, şair, jurnalist, təqaüdçü müəllim Şəmsəddin Kuzəçi və Azərbaycan Respublikasının Əməkdar jurnalisti, BAYRAQDAR MEDİA-nın baş redaktoru, Azərbaycan Mətbuat Şurası İdarə heyətinin üzvü, İctimai televiziya və Radio Yayımları Şirkəti Yayım Şurasının üzvü Azər Həsrət Dövlət Arxivinin Şirvan filialında qonaq olub.
Xəbər BAYRAQDAR MEDİA-ya sözügedən Filialdan verilib.
Qonaqlar əvvəlcə 18 oktyabr – 09 noyabr tarixlərində filialda təşkil olunan “Müstəqil ölkəmin qəhrəman oğulları” adlı sərgiyə baxış keçirib.
Ulu Öndər Heydər Əliyevin, şəhidlərin və dəyərli türk qadını Qənirə Paşayevanın xatirəsi anılıb, rəhmət oxunub.
ARDA Şirvan filialının kollektivi masa ətrafında tədqiqatçının Kərkük və Azərbaycan mədəniyyətinə, ədəbiyyatına aid kitablarını birgə müzakirə edib. Kərkük ədəbiyyatı mövzusunda 70-dən artıq kitabın müəllifi olan Şəmsəddin Kuzəçi Arxivə hədiyə etdiyi kitabları barədə kollektivə geniş məlumat verib. İraq-Azərbaycan, Kərkük-Azərbaycan elmi-ədəbi əlaqələrinin inkişaf etdirilməsində böyük xidmətlər göstərən tədqiqatçı Azərbaycana səfərləri barədə növbəti kitab üzərində çalışdığını və 24-cü səfərinin Şirvan şəhərinə olduğunu bildirib.
Sonra qonaqlar Şirvan şəhər Tarix Diyarşünaslıq Muzeyi ilə tanış olub. Onlara şəhərin tarixini özündə əks etdirən eksponatlar barədə məlumat verilib.
Sonda xatirə şəkilləri çəkilib.
