BAYRAQDAR MEDİA – Azərbaycan Dövlət Akademik Musiqili Teatrı Ümummilli lider Heydər Əliyevin anadan olmasının 100, Azərbaycan peşəkar milli teatrının yaranmasının 150 illiyi münasibətilə hazırladığı “Sən elə bir zirvəsən!” adlı musiqili-tarixi esseni bu dəfə Mingəçevirdə nümayiş etdirib.
Bu haqda xəbər BAYRAQDAR MEDİA-ya sözügedən Teatrın mətbuat xidmətindən daxil olub.
Xəbərdə qeyd edilir ki, “Mədəniyyət Nazirliyinin dəstəyi ilə Mingəçevir Dövlət Dram Teatrında həyata keçirilən layihədə Ulu öndərin əziz xatirəsi ehtiramla yad olunub, dahi şəxsiyyətin həyat və fəaliyyətinə nəzər salınıb. Teatrın solistləri Əməkdar artist Səidə Şərifəliyeva, Prezident mükafatçıları Mehriban Zaliyeva, Səmədzadə Xasiyev, aktyorlar İbrahim Əlizadə, Aydan Həsənova, Şaban Cəfərov, Türkel Tariqpeyma, Emin Zeynallı, həmçinin teatrın xor və balet artistlərinin maraqlı çıxışları tamaşaçılar tərəfindən hərarətli alqışlarla qarşılanıb. Mingəçevir Dövlət Dram Teatrının direktoru, Əməkdar artist İntiqam Soltan tədbirin ərsəyə gəlməsində rolu olan hər kəsə təşəkkürünü bildirib”.
Qeyd edək ki, tamaşanın ssenari müəllifi Əməkdar artist Mübariz Həmidov, quruluşçu rejissoru Cavid İmamverdiyev, quruluşçu dirijoru Əməkdar incəsənət xadimi Fəxrəddin Atayev, xormeysteri Əməkdar artist Vaqif Məstanov, baletmeysteri Əməkdar artist Emin Əliyev, rejissor assistenti Afər Tağıyevadır.
Xatırladaq ki, ilk dəfə Ümummilli liderin doğum günündə Musiqili Teatrın səhnəsində təqdim olunan bu tamaşa daha sonra Gəncə və Şəkidə də uğurla göstərilib. Kollektivin növbəti çıxışları Lənkəran və Naxçıvanda olacaq.
