Son yeniləmə: 3 Oktyabr 2023 10:38
BAYRAQDAR MEDİA – Azərbaycanın Meksikadakı səfiri Məmməd Talıbov “France 24” telekanalının ispan dillində yayımlanan efirində debat proqramının qonağı olub.
Bu barədə BAYRAQDAR MEDİA-ya səfirlikdən məlumat verilib.
Bildirilib ki, “səfir Azərbaycanın Qarabağ bölgəsində cərəyan edən son hadisələr və Ermənistan ilə münasibətlərin normallaşma prosesi haqqında ətraflı məlumat verib, Ermənistan tərəfini riyakarlığa və qarayaxma kampaniyasına son qoyaraq iki ölkə arasında dayanıqlı sülhün bərqərar edilməsi üçün səmimi səy göstərməyə çağırıb. Debat zamanı guya “Qarabağda etnik təmizləmənin həyata keçirilməsi”, “Laçın yolunun blokadaya alınması” kimi cəfəng iddialar səsləndirən Güney Amerikanın Erməni Milli Şurasının icraçı direktoru Aram Mouratian azərbaycanlı diplomatın təqdim etdiyi tarixi həqiqətlər, tutarlı faktlar və dəlillər qarşısında aciz durumda qalıb. Hətta erməni həmsöhbətə təxribat yönümlü sualları ilə kömək etməyə çalışan verilişin aparıcısı da əsaslandırılmış cavablardan sonra çıxılmaz vəziyyətə düşüb”.
Məlumata görə, məhz Ermənistanın uzun illər Azərbaycana və xalqımıza qarşı işğalçılıq, etnik təmizləmə siyasəti həyata keçirdiyi, bu gün də erməni mina terrorunun ağır fəsadlarının davam etdiyi qeyd olunub: “Bütün çətinliklərə baxmayaraq, Azərbaycan Hökumətinin işğaldan azad edilmiş ərazilərdə genişmiqyaslı bərpa-quruculuq işləri həyata keçirdiyi və bu əraziləri dünyanın ən gözəl guşələrindən birinə çevirməkdə qərarlı olduğu bildirilib. Lokal xarakterli antiterror tədbirlərinin keçirilməsini şərtləndirən səbəblərə toxunan diplomat qarşıda duran bütün vəzifələrin cəmi bir gün ərzində yerinə yetirildiyini bildirib, Qarabağın erməni sakinlərinin ölkəmizin konstitusiya çərçivəsinə reinteqrasiyası istiqamətində atılan addımlardan bəhs edib. Azərbaycanın milliyətindən asılı olmayaraq bütün vətəndaşlarının hüquq və azadlıqlarına tam təminat verdiyi və Azərbaycanın ərazi bütövlüyünü tanıdığını bəyan edən Ermənistan Hökumətinin ölkəmizə qarşı ərazi iddialarından əl çəkməsinin, yalanlara və riyakarlığa son qoymasının vacibliyi qeyd olunub. Xüsusi vurğulanıb ki, Ermənistan tərəfi bu tarixi fürsəti əldən qaçırmamalı, Azərbaycanın sülh gündəliyinə və çağırışlarına uyğun olaraq mehriban qonşuluq şəraitində yaşamaq, eləcə də regionda əmin-amanlığın təmin olunması üçün səmimi səylər göstərməlidir. Bölgədəki bütün nəqliyyat və kommunikasiyaların, o cümlədən Zəngəzur dəhlizinin açılmasının bu prosesə əhəmiyyətli töhfə ola biləcəyi qeyd olunub. Həmçinin Azərbaycanı hədəf seçən radikal erməni diasporunun çirkin təbliğat kampaniyasının və pozucu fəaliyyətinin qəbuledilməz olduğu və iki ölkə arasında sülh və normallaşma prosesinə yalnız xələl gətirdiyi vurğulanıb”.
Məlumatda deyilir ki, azərbaycanlı diplomat çıxışını “Qarabağ Azərbaycandır!” şüarı ilə bitirib, erməni tərəf müqabili isə “Qarabağ sakinlərinin hüquqlarının və təhlükəsizliyinin təmin ediləcəyinə inanmağın çətin olduğunu” bildirməklə kifayətlənmək məcburiyyətində qalıb.
32 dəqiqədən çox davam edən verilişin video yazısı telekanalın internet səhifəsində yerləşdirilib.
