Fikri Ataoğlu, hər bir tələbə öz ölkəsinin tanıtımına bir bələdçi olaraq töhfə ver
BAYRAQDAR MEDİA – Bakıda Beynəlxalq Türkiyə Məzunlarının Azərbaycan toplantısı keçirilib.
Kibris Postası xəbər verir ki, tədbirdə KKTC Baş nazirinin müavini Fikri Ataoğlu da iştirak edib: “Baş nazirin müavini Aparatından verilən məlumata görə, Türkiyədən kənarda ilk dəfə Azərbaycanda keçirilən proqramda YTB başqanı Abdullah Eren, Azərbaycanın elm və təhsil naziri Emin Əmrullayev, Diasporla İş üzrə Dövlət Komitəsinin sədri Fuat Muradov, Türkiyə Kosmik Agentliyinin prezidenti Serdar Hüseyn Yıldırım, Türkiyənin Azərbay andakı səfiri Cahit Bağcı, siyasətçi Sinan Oğan, azərbaycanlı millət vəkilləri və çoxlu sayda türkiyəli məzun iştirak edib”.
Məlumata əsasən, tədbirdə çıxış edən A.Eren bildirib ki, Bakıda keçirilən toplantıda dünyanın 21 müxtəlif ölkəsindən məzunlar birliklərinin nümayəndələri iştirak ediblər. O, deyib ki, görüşdə iştirak edən məzunlar türkcə danışaraq öz ölkələrinin problemlərini müzakirə ediblər: “Hazırda 35 ölkədə türk məzunları dərnəyimiz var. Türkiyədə 16 min təqaüdçü tələbəyə ev sahibliyi edirik. 2011-ci ildən bəri hökumət təqaüdlərimizlə 40 minə yaxın beynəlxalq tələbəni Türkiyədə qəbul etmişik. Təbii ki, ən çox tələbə Azərbaycandan gəlib. Hazırda Türkiyədə 34 min azərbaycanlı tələbə təhsil alır. “Bu günə qədər Azərbaycandan 100 mindən çox məzunumuz var”.
Azərbaycanın elm və təhsil naziri Emin Əmrullayev çıxışında deyib: “Türkiyəli məzunlar Azərbaycanın bütün sahələrində mühüm rol oynayır və böyük töhfələr verirlər. Buna görə Türkiyə dövlətinə təşəkkür edirəm”.
KKTC Baş nazirinin müavini, turizm, mədəniyyət, gənclər və ətraf mühit naziri Fikri Ataoğlu çıxışına türk dostu Azərbaycan millət vəkili Qənirə Paşayevanın vəfatından kədərləndiklərini söyləyərək, ailəsinə və Azərbaycan xalqına başsağlığı verib: “F.Ataoğlu Azərbaycanda olmaqdan məmnunluğunu da dilə gətirib və Azərbaycanın Kuzey Kıbrısa olan marağından məmnun olduqlarını bildirib. Müxtəlif ölkələrdən gələn tələbələrin o ölkənin mədəni dəyərlərini öyrəndiyini deyən F.Ataoğlu, hər bir tələbənin öz ölkəsinin tanıtımına bir bələdçi olaraq töhfə verdiyini bildirib”.
Çıxışına davam edən F.Ataoğlu, “Xoşbəxtlikdən hamımızı qoruyan Ana vətənimiz Türkiyə var. Türkiyənin bizim tərəfimizdə olduğunu hiss etdiyimiz üçün qarşılaşdığımız hər problemi birlikdə həll edirik” deyib.
Azərbaycandan Kuzey Kıbrısa ali təhsil almaq üçün gələn tələbələrin olduğunu da qeyd edən F.Ataoğlu, edilən təqdimatlarla önümüzdəki illərdə daha çox tələbənin KKTC-yə gələcəyinə ümid etdiyini bildirib.
